Naıb múftı Mysyrda Halyqaralyq konferentsııaǵa qatysýda (FOTO)

Búgin Egıpet eliniń astanasy Kaır qalasynda Ýaqyp mınıstrliginiń uıymdastyrýymen «Memlekettiń saqtalýyn qamtamasyz etý úshin ulttyq sáıkestikti qalyptastyrý» atty Halyqaralyq konferentsııa óz jumysyn bastady. Mysyr prezıdentiniń qoldaýynyń aıasynda ótip jatqan alqaly jıyn jumysy eki kúnge sozylatyn bolmaq.

Halyqaralyq konferentsııa jumysyna Bas múftı Serikbaı qajy Oraz tapsyrmasymen elimizden arnaıy delegatsııa attanǵan bolatyn. QMDB tóraǵasynyń birinshi orynbasary, naıb múftı, Astana qalasynyń bas ımamy Naýryzbaı qajy Taǵanuly bastaǵan top aıtýly jıyn aıasynda biregeı baıandamalar jasap, arnaıy kezdesýler ótkizý josparlanǵan.

Beıbarys babamyz bılik qurǵan Mysyr jerindegi Halyqaralyq basqosýǵa Qazaqstannyń Egıpettegi tótenshe jáne ókiletti elshisi Arman Isaǵalıev, «Nur-Múbárak» ýnıversıtetiniń prorektory Qaırat Qurmanbaev jáne ýnıversıtet ustazy Seıdmuhammed Abdýnaımdar qatysyp, Halyqaralyq deńgeıdegi basqosý barysynda elimizdi tanystyratyn bolmaq.