Naıb múftı «S.Ǵylmanı» meshitiniń jamaǵatymen júzdesti (FOTO)

QMDB tóraǵasynyń birinshi orynbasary, naıb múftı, Nur-Sultan qalasynyń ókil ımamy Naýryzbaı qajy Taǵanuly elordadaǵy «Sádýaqas qajy Ǵylmanı» meshitiniń jamaǵatymen kezdesip, qasıetti Ramazan aıy qarsańynda orazaǵa daıyndyq jaıly ýaǵyz aıtty.

«Ramazanǵa rýhanı ázirlik» taqyrybynda ýaǵyz aıtqan naıb múftı:

«Ramazan – asyǵa kútken musylman qaýymy úshin Allanyń sheksiz meıirimine bólenetin úlken múmkinshilik aıy. Bul aıdyń qadir-qasıetin túsingen musylmandar osynaý múbárak aımen qımaı qoshtasyp, al qaıta qaýyshqanda qurmetti qonaǵyn kútkendeı qushaq jaıa qarsy alady. Óıtkeni bul aı árbir janǵa ıláhı meıirim syılaıtyn saýaby mol maýsym.

Ramazan – jyl saıyn bir aı boıy esigin aıqara ashatyn Jaratqan Iemizdiń tárbıelik mektebi. Allanyń quldary bul aıda ózderin Haq Taǵalaǵa boısunýǵa jáne de kúnálardan tyıylýǵa jattyǵady.

Paıǵambarymyzdyń (s.ǵ.s.) kózin kórgen sahabalar ramazanǵa alty aı qalǵanda «ramazanǵa jetkiz»,- dep Alladan tilek tilep, ramazan aıy ótkennen keıin alty aı boıy qasıetti aıda jasaǵan jaqsylyq amaldarymdy qabyl et dep duǵa etetin bolǵan. Adamzattyń ardaq tutar ustazy (s.ǵ.s.), Ramazan qarsańynda Alladan bylaı dep suraýymyzdy úıretken:

اللَّهُمَّ بَارِكْ لَنَا فِي رَجَبٍ وَشَعْبَانَ وَبَلِّغْنَا رَمَضَانَ

«Iá Allam, bizderge Erejep jáne Shaǵban (aılarynda) bereket ber ári bizderdi Ramazanǵa  (amandyqta) jetkize gór», –  dedi naıb múftı Naýryzbaı qajy Taǵanuly.

Sondaı-aq, «Sádýaqas qajy Ǵylmanı» meshitiniń Bas ımamy Nurlan Ramazanovtyń uıymdastyrýymen, qasıetti Shaǵyban aıynyń qurmetine jaıylǵan aýyzashar dastarhanyna 150-ge jýyq jamaǵat jınaldy. Shara sońynda dastarhan basyna jınalǵan jamaǵatqa meshit aqsaqaldary aq batasyn berdi.