Naýqas sábılerdiń analaryna merekelik kesh uıymdastyryldy (FOTO)

Búgin QMDB Nur-Sultan qalasy ókildigine qarasty «Aqmeshit» meshitiniń uıytqy bolýymen «Baqytty shańyraq» qoryna múshe analarǵa arnalǵan «Asyl ana – el júregi» atty merekelik kesh ótti. Erekshe qajettilikteri bar balalardy tárbıelep jatqan otbasylardy qoldaý jáne kómek berý boıynsha qurylǵan «Baqytty shańyraq» qorynyń ortalyǵynda meshit qyzmetkerleriniń uıytqy bolýymen merekelik kontsert uıymdastyrylyp, arnaıy dastarhan jaıyldy.

Saýapty sharaǵa Qazaqstannyń eńbek sińirgen ártisi Maıra Ilııasova bastaǵan bir top ónerpazdar da óz úlesin qosyp, taǵdyr synaǵyna moıymaǵan qaısar analarǵa qurmetterin kórsetti. Túrli mýzykalyq aspaptardan kúı tógilip, ánmen árlengen shara aıasynda analarǵa gúl shoqtary da taratylyp, asqan qajyrlyqtary úshin ókildik atynan «Alǵys hat» ta tabystaldy.

Merekelik keshke respýblıkalyq «Áziret Sultan» meshitiniń naıb ımamy Baqytjan Ótkelbaev qatysyp, izgi tilegin bildirdi. Qala bas ımamy Erbolat Júsipovtiń ystyq sálemin jetkizip, qaısar analardy merekesimen quttyqtady.

Shara sońynda ata-analar men balalar arnaıy jaıylǵan dastarhannan dám tatyp, ortalyqtaǵy merekelik kóńil-kúı kópke deıin jalǵasty.

Sýretterdi «FOTOGALEREIa» aıdarynan kóre alasyzdar!