NAÝRYZBAI QAJY TAǴANULY ISLAM ÓRKENIETI MÝZEIINIŃ AShYLÝYNA QATYSTY (FOTO)

Búgin Petropavl qalasynda ıslam órkenıetine arnalǵan mýzeı ashyldy. Saltanatty rásimge aımaq basshysy Aıdarbek Saparov pen QMDB Tóraǵasy, Bas múftı Naýryzbaı qajy Taǵanuly arnaıy qatysty.

1857 jyly salynǵan ǵımarat buǵan deıin zaýyt qoımasy retinde paıdalanylyp kelgen bolatyn. Nysan memleket menshigine qaıtarylyp, kúrdeli jóndeýden ótken. Bul nysan Soborlyq meshit retinde turǵyzylǵan. Ǵımarat zaýyttyń ıelegine berilgenimen Keńestik kezeńde munarasy buzylmaǵan jalǵyz meshit retinde saqtalypty. Oblystyq muraǵat dırektory Sáýle Málikovanyń aıtýynsha meshit týraly derekter Omby, Orynbor, Ýfa arhıvterinen qaralǵan. Qazirgi tańda mýzeıge jádigerler jınalýda. Sonyń biri 18 ǵasyrda basylǵan Quran kitap osynda qoıylypty.

Aıta keteıik 1921 jyly Petropavlda 9 meshit bolǵan. Soborlyq meshit qurylysy Petropavlda turatyn azııalyq saýdagerlerdiń esebinen júrgizilgen. Sıpattamasyna kelsek meshit birqabatty tastan turǵyzylǵan. Qulshylyq úıiniń ǵımaratynda sheńbermen qorshalǵan jáne syrtynan sheńber boıymen tastarmen óńdelgen 8 tikburyshty tereze bar. Bul terezeler áli kúnge deıin saqtalǵan. Munara búıir jaǵynda ornalasqan.

Jańa ortalyqty aralap, tanysqan soń Bas múftı mýzeıge qajetti jádigerler berýge ýáde etti.

​