Ókil ımam erekshe erligi úshin marapattaldy
Búgin Qaraǵandy oblysynyń polıtsııa departamentinde 2019 jyldyń birinshi toqsanynda atqarylǵan qyzmetti qorytyndylaıtyn kezdesý ótti. Otyrys barysynda polıtsııa departamenti basshysynyń orynbasary Erlan Faızýllın Qaraǵandy oblysynyń ókil ımamy Ómirzaq Qazkenuly Bekqojany tótenshe jaǵdaıda kórsetken azamattyq erligi úshin IIM-niń logotıpi beınelengen arnaıy saǵatpen marapattap, basshylyq atynan úlken alǵys bildirdi dep habarlaıdy «newtimes.kz».
Esterińizge sala keteıik, 17 sáýirde 34 jastaǵy Qaraǵandy qalasynyń turǵyny otbasylyq janjaldyń saldarynan týysqandaryn úıden qýyp shyǵyp, óziniń kishkentaı qyzynyń moıynyna pyshaq ustap, kepildikke alǵan bolatyn. Páterge polıtsııa qyzmetkerleri kelgen kezde azamat óziniń qyzyn óltiretinin málimdep, avtokólik talap etip oblystyq «Ánet baba» meshtine baratynyn jarııalaǵan. Kishkentaı qyzdyń qaýipsizdigi úshin azamatpen kelissózge otyrǵan polıtseı qyzmetkerleri qylmyskermen ilesip oblystyq meshitke kelgen. Meshit aınalasyna jedel qyzmetkerler toptastyrylyp, qorshaýǵa alyndy. Al meshit ishindegi kelissózderge polıtsııa qyzmetkerlerimen birge oblys ókil ımamy aralasyp, azamatqa toqtaý aıtyp, ony raıynan qaıtardy. Arnaıy jasaq pen oblys ımamynyń tanytqan erliginiń arqasynda qylmysker qolǵa tústi. Operatsııa barysynda eshkim zaqym shekken joq.
Ótken jyly ózindik erlik tanytqan azamattardyń qatysýymen 31 qylmys ashylyp, 480-den astam quqyqbuzýshylyqtyń aldy alynǵan. Polıtsııa departamentiniń basshylyǵy 35 azamatty quttyqtap, 6 azamat qala ákiminiń alǵys hattarymen marapattaldy.
