Oraza aıt qutty bolsyn!
Asa qamqor erekshe meıirimdi Allanyń atymen bastaımyn! Barlyq maqtaý Allaǵa tán. Ardaqty Paıǵambarymyz Muhammedke Allanyń salaýaty men sálemi bolsyn!
Qadirli otandastar!
Barshamyzdy oraza aıtyna aman-esen jetkizgen Allaǵa sansyz shúkirler bolsyn! Sizderdi ısi musylmannyń ulyq meıramy – oraza aıttyń kelýimen shyn júrekten quttyqtaımyn!
Qasıetti Ramazannyń aıaqtalǵanyn bildiretin meıramda, júrekke meıirim, qýanysh sezimi uıalaıtyn sáýleli sátte sizderge, otbasylaryńyzǵa rııasyz nıetpen Allanyń amandyǵy men berekesin tileımin. Jaratqan jar bolsyn!
Alla Taǵala otyz kún boıy ustaǵan orazamyzdy, jasaǵan duǵamyzdy, oryndy sebeptermen aýyz bekite almaı qalǵan jandardyń qaıyrly amaldaryn qabyl etkeı! Ámın!
«Aıt» sózi – «merekeleý», «hal surasý», «bir-birin qýantý», «qýanyshqa toptalý», «qarymta» degen maǵynany bildiredi.
Jaratýshy Jabbar Iemiz: «...Olar Men úshin oraza ustady, Meniń pármenimmen aýyz ashty, endi qýanyshqa kenelsin...» – dep súıinshi habar jetkizgen.
Jaratýshy Iemiz barsha qaýymnyń qýanyshyn arttyrǵaı!
Oraza aıt – otbasylyq mereke. Meıram kúni syılyq berip, qýanyshqa bóleý – saýapty is. Kómekke muqtaj adamǵa qaıyrymdylyq jasaý da saýaby mol amaldyń biri.
Qurmetti jamaǵat!
Bıyl qasıetti Ramazan aıy karantın jaǵdaıynda ótkenin jaqsy bilesizder. Bul jaǵdaı saýapty amaldar men ıgi sharalarǵa kedergi keltirmedi. Meshit tarapynan kómekke muqtaj otbasylarǵa qaıyrymdylyq jasaldy. Aýyzashar asy tegin taratyldy. Maqtaaral aýdanyndaǵy jerlesterimizge gýmanıtarlyq jáne qarjylaı kómek kórsettik.
Saýaptar eselenip jazylatyn berekeli aıda ıgi iske atsalysqan barsha azamatqa aıryqsha alǵysymdy bildiremin. Alla razy bolsyn!
«Qaıyrymdylyq jasasań – qaıyryn óziń kóresiń» dep halqymyz aıtqandaı, izgi amaldyń saýaby eselinip, qaıyryn ózderińiz kórińizder dep tileımin.
Qazaqstan musylmandary dinı basqarmasynyń tótenshe jaǵdaı kezinde qabyldaǵan sheshimine túsinistik tanytyp, orazany oqshaý túrde ótkizip, úıde qulshylyq jasaǵan jamaǵatqa óz atymnan taǵy da alǵysymdy jetkizemin. Alla qabyl etsin!
Oraza aıt merekesi qutty bolsyn! Rabbymyz duǵa-tilegimizdi, qasıetti aıda jasaǵan qaıyrly amalymyzdy, bergen zeket pen pitir sadaqamyzdy qabyl etkeı!
Ár otbasyna amandyq, jaqsylyq tileımin. Orazadan orazaǵa deıin aman-esen jete bereıik! Jer betinen juqpaly dert joıylyp, merekeli, berekeli sátterde júzdesýdi jazǵaı! Elimiz aman, jurtymyz tynysh bolǵaı! Ámın!
Naýryzbaı qajy TAǴANULY,
Qazaqstan musylmandary dinı basqarmasynyń tóraǵasy, Bas múftı
