Óskemen qalasynda salttyq qyzmet ortalyǵynyń zamanaýı ǵımaraty salynady
Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanuly bastamasymen qurylǵan QAMQOR-SHARAPAT ortalyǵy halyqqa tıimdi qyzmet kórsetip, jergilikti atqarýshy organdar tarapynan qoldaý tabýda.
Atap aıtqanda, zırattardy birizdi úlgide uıymdastyrý úshin arnaıy sektorlar bólinip, meshitter janynan salttyq qyzmet kórsetý bólimshelerin salýǵa jer telimderi qarastyrylýda. Bul – dinı rásimderdi retteý men turǵyndarǵa qolaıly jaǵdaı jasaý baǵytyndaǵy mańyzdy qadam.
Qazaqstan Respýblıkasynyń Dinı qyzmet jáne dinı birlestikter týraly zań talaptaryna sáıkes, dinı joralar ǵıbadat úılerinde jáne arnaıy bólingen oryndarda ótkizilýi tıis. Osyǵan baılanysty salttyq qyzmet kórsetý ınfraqurylymyn damytý – búgingi kúnniń ózekti máselesi.
Osy baǵyttaǵy jumystarmen tanysý maqsatynda Shyǵys Qazaqstan oblysynan arnaıy delegatsııa elordaǵa issaparmen keldi. Delegatsııa quramynda Din isteri basqarmasynyń basshysy Erbol Oshakbaev pen Din máselelerin zertteý ortalyǵynyń dırektory Serik Smetov boldy. Olar QMDB tóraǵasynyń orynbasary, naıb múftı Ermek Muqataı birge respýblıkalyq bas meshit janyndaǵy salttyq qyzmet kórsetý bólimshesiniń jumysymen tanysty.
Kezdesý barysynda ortalyq dırektory mekemeniń el kóleminde atqaryp jatqan jumystaryn tanystyryp, qyzmettiń júıelengen óńirlerinde jańa jumys oryndary ashylyp jatqanyn atap ótti. Sonymen qatar, qyzmet tólemderi bank júıesi arqyly qabyldanyp, jergilikti bıýdjetke salyq retinde túsip otyrǵany aıtyldy.
Jıyn qorytyndysynda qonaqtar QMDB-nyń zırat mádenıetin qalyptastyrý baǵytyndaǵy jumysyna joǵary baǵa berdi. Sondaı-aq kópqabatty turǵyn úıler aýlasynda ótetin janaza rásimderiniń turǵyndarǵa qolaısyzdyq týdyratynyn atap ótip, Óskemen qalasynda salttyq qyzmet kórsetý ortalyǵyn salýǵa jer telimin bólý jáne jańa zırat jumysyn júıeleý baǵytynda QAMQOR-SHARAPAT ortalyǵy men birlesip jumys isteýge daıyn ekenderin jetkizdi.
