Óskemendegi «Halıfa Altaı» meshitinde biregeı murajaı ashyldy (FOTO)
Qurban aıt merekesinde Shyǵys Qazaqstan oblysy ákiminiń qoldaýymen «Halıfa Altaı» meshitinde «Islam mádenıeti ulttyq dástúr» atty murajaı ashyldy.
Murajaıdyń ashylýynda QMDB Óskemen aımaǵynyń ókil ımamy Ermek Qasbolatuly: «Bıyl Qurban aıt meıramy oblystyq «Halıfa Altaı» meshitinde «Islam mádenıeti ulttyq dástúr» murajaıy ashylýymen erekshe bolyp otyr. Bul ıgi is rýhanı jańǵyrý bastamasynyń aıasynda oblystyq ákimdiktiń qoldaýymen júzege asty. Meshit tek dinı qulshylyq orny ǵana emes salt-dástúrdi, tarıhymyzdy nasıhattaıtyn iri rýhanı ortalyq bolýy tıis. Búgingi zaman talaby da osyǵan saıady»,- dedi.
Murajaıdyń lentasyn Shyǵys Qazaqstan oblysynyń ákimi Danıal Ahmetov jáne QMDB Qaıyrymdylyq jáne ýaqyp isteri bóliminiń meńgerýshisi Kamaljan Turdybaev qıdy. Oblys basshysy D.Ahmetov rýhanı jańǵyrý aıasynda ultymyzdyń tarıhyn túgendep, ony urpaqqa amanat etýdiń mańyzdy is ekendigine toqtala kele, «Biz tarıhy baı, keleshegi kemel ultpyz. Bul jerden Islam tarıhymen ulttyq dástúrden de mol maǵlumat alýǵa bolady» dep túıindep, murajaıdyń el ıgiligine qyzmet etetindigin jetkizdi.
«Islam mádenıeti jáne ulttyq dástúr» murajaıy saq, ǵun, túrki dáýiri jáne ıslam tarıhy, qazaq halqynyń mádenıeti degen negizgi bólimderden turady. Murajaı tórine Kúltegin eskertkishiniń kóshirmesi, Taıqazan, qazaqtyń alty qanat kıiz úıi qoıylyp, Arystanbab, Qoja Ahmet Iassaýı kesenesiń beınesi bederlengen. Birqatar meshitterdiń maketi qoıyldy. Qasıetti Quran kitabynyń birneshe tildegi Elektrondy zamanýı kóshirmesi, tarıhı qundy eńbekterdiń Elektrondy nusqalaryn da bul jerden kórýge bolady.
Ulyq meıram Qurban aıt qarsańynda bul dinı rýhanııatqa jasalǵan úlken syı boldy. Is-sharaǵa jınalǵan halyq jádigerlerdi tamashalap, bastama ıelerine shynaıy qýanysh, tilekterin bildirdi.
