PATRIOTTYQ SEZIM SYILAITYN SÁT

Naýryzbaı qajy TAǴANULY,

Qazaqstan musylmandary dinı basqarmasynyń tóraǵasy, Bas múftı 
 

Qadirli otandastar!

Elimizde 4 maýsym – memlekettik rámizder kúninde Týymyzdy, Ánuranymyz ben Eltańbamyzdy qurmetteý, ony halyqqa dáripteý syndy ıgi is-sharalar júzege asady. Urpaqty ultjandylyqqa, otanshyldyqqa tárbıeleýde aıtýly kúniniń mańyzy erekshe.

Asyl dinimiz Islam rámizderge erekshe mán beredi. Ardaqty Paıǵambarymyz Muhammed (oǵan Allanyń salaýaty men sálemi bolsyn) musylman úmbeti úshin mańyzdy oqıǵalar kezinde tý men jalaý ustaǵan. Hadıs ǵalymdary óz kitaptarynda tý men jalaýǵa qatysty arnaıy taraý arnaǵan.

Otan – qurmet pen baǵalaýǵa laıyqty qundylyq. Ánuranymyz shyrqalǵanda ornymyzdan turyp, qurmet kórsetetinimiz sondyqtan. Bul – musylman memleketterinde kórinis tapqan jaqsy úrdis. Sharıǵatymyz memlekettik tý kóterilgende, ánuran oryndalǵanda qurmet kórsetýge ruqsat beredi.
 

Qurmetti qaýym!

Memlekettik rámizder – ár azamatqa erekshe jiger men patrıottyq sezim syılaıtyn qundylyqtar. Kók týymyz kókte jelbirep, ánuranymyz árkez shyrqalyp, eltańbamyz eldigimiz ben birligimizdiń sımvolyna aınalǵaı.

Alla Taǵala urpaǵymyzdy ımandy, ultjandy etip, elimiz ben jerimizdiń bolashaǵy jolynda aıanbaı eńbek ete berýin násip etkeı. Táýelsizdigimiz tuǵyrly, halqymyz ǵumyrly bolǵaı. Ámın!