Prezıdent Qasym-Jomart Toqaev «Áziret Sultan» meshitine keldi (FOTO+VIDEO)

Memleket basshysy Qasym-Jomart Toqaev «Áziret Sultan» meshitine kelip, Qazaqstan musylmandary dinı basqarmasynyń jańadan saılanǵan bas múftıi Naýryzbaı qajy Taǵanulymen kezdesti. Bul týraly Prezıdenttiń baspasóz qyzmeti habarlady.

Qazaqstan Prezıdenti bas múftıdi jańa laýazymymen quttyqtap, aldaǵy qyzmetine tabys tiledi. Kezdesý barysynda eldegi tatýlyq pen turaqtylyqty saqtaý, din arqyly azamattardy kelisim men yntymaqqa shaqyrý, rýhanı baǵdar berý qajettiligi men  jat dinı aǵymdardyń zııandy áreketteri jaıynda aıtyldy.

«Halyqty tatýlyqqa, birlikke, pátýaǵa shaqyrý kerek. Qazirgi ýaqytta dúnıe júzinde ártúrli jat úderister paıda bolyp jatyr. Sondyqtan buǵan tyıym salyp, jol bermeýge tıispiz. El múddesine qyzmet etip, osy baǵytta durys úgit-nasıhat jumystaryn júrgizý qajet», – dedi Qasym-Jomart Toqaev.

Naýryzbaı qajy Taǵanuly Memleket basshysyna Qazaqstan musylmandary dinı basqarmasynyń aldaǵy aqparattyq jáne uıymdastyrýshylyq jumystary men qaıyrymdylyq sharalarynyń josparyn tanystyrdy. Basqarma jumysy ımandylyq, otanshyldyq, bilimdilik, aýyzbirshilik, eńbekqorlyq, mádenıettilik  jáne ádildik sııaqty jeti rýhanı qazyqqa negizdelmek.