Qala bas ımamy «Ás-Sálam» meshitinde kóshpeli otyrys ótkizdi

Astana qalasynyń bas ımamy Erbolat Júsipov bastaǵan ókildik qyzmetkerleri elordadaǵy «Ás-Sálam» meshitine baryp, kóshpeli otyrys ótkizdi.

Kezdesý barysynda din qyzmetkerlerimen meshit jumysyna qatysty birqatar mańyzdy máseleler talqylandy. Atap aıtqanda, dinı-aǵartýshylyq baǵyttaǵy jumystardy kúsheıtý, jamaǵatpen baılanysty nyǵaıtý, jastar tárbıesine kóńil bólý jáne QMDB jarııalaǵan «Islam jáne adal qoǵam» jyly aıasyndaǵy jobalardy júıeli júzege asyrý jaıy sóz boldy.

Sonymen qatar meshit qyzmetkerleriniń áleýmettik jaǵdaıy, qyzmet sapasyn arttyrý jáne ishki tártip máseleleri de nazardan tys qalmady. Qala bas ımamy din qyzmetkerleriniń jaýapkershiligi men halyqpen tyǵyz baılanysynyń mańyzyn atap ótti.

Astana qalasy ókildiginiń bas esepshisi Qaırat Qasenov meshittiń býhgalterlik qujattarymen tanysyp, qarjylyq jumystardyń júrgizilý barysyn saralady. Al ókildiktiń is-basqarýshysy Jandillá Mamythanuly ákimshilik-sharýashylyq baǵyttaǵy jumystardy pysyqtap, tıisti usynystaryn jetkizdi.

Óz kezeginde meshittiń bas ımamy Dastan Zııashuly meshitte atqarylyp jatqan rýhanı sharalar, jamaǵatpen júrgizilip otyrǵan jumystar men áleýmettik bastamalar jóninde málimet berdi.

Kezdesý sońynda meshit ujymyna aldaǵy qyzmetterine tabys tilep, el ıgiligi jolyndaǵy eńbekterine bereke tiledi.