QALA BAS IMAMY RÝHANI SAIYSTYŃ AShYLÝ SALTANATYNA QATYSTY

Astana qalasynyń bas ımamy Nurbek qajy Áýeshanuly «Sádýaqas qajy Ǵylmanı» meshitinde áıel shákirtter arasynda ótetin Sıra (Paıǵambar ómirbaıany) men salaýat jarysynyń ashylý saltanatyna qatysty.

Shákirtterdiń dinı bilimin arttyryp, Paıǵambarymyz Muhammedtiń (Oǵan Allanyń salaýaty men sálemi bolsyn) ómir joly men ónegesin tereńirek tanytý maqsatynda uıymdastyrylǵan taǵylymdy sharany meshittiń Áıel-qyzdar sektory ótkizdi.

Qala bas ımamy jarysqa qatysqan shákirtterge aqjoltaı tilegin aıtyp, sıra iliminiń musylman ómirindegi mańyzyna toqtaldy. Paıǵambarymyzdyń sabyry, adaldyǵy, keshirimdiligi men kórkem minezi árbir musylmanǵa úlgi ekenin atap ótti.

«Búgingi jarysta oryn alýdan bólek odan da mańyzdysy – daıyndalý barysynda alǵan bilimderińizdi júrekterińizge sińirip, kúndelikti ómirlerińizde qoldana bilý. Paıǵambarymyzdyń ómirin oqyp, onyń qandaı tulǵa bolǵanyn bilý – bizge úlken jaýapkershilik júkteıdi. Óıtkeni jaqsy musylman bolý tek bilimmen emes, sol bilimdi jaqsy amal men kórkem minez arqyly kórsetýimen ólshenedi.», – dedi Nurbek qajy Áýeshanuly.

Sondaı-aq, qala bas ımamy shákirtterdiń rýhanı tárbıesine atsalysyp, bilim alýyna jaǵdaı jasap júrgen ustazdarǵa alǵysyn bildirdi. Qatysýshylarǵa sáttilik tilep, bilimderiniń berekeli bolýyna duǵa jasady.