QASIETTI QADIR KEShI MÚBÁRAK BOLSYN!
Naýryzbaı qajy TAǴANULY,
Qazaqstan musylmandary dinı
basqarmasynyń tóraǵasy, Bas múftı
QASIETTI QADIR KEShI MÚBÁRAK BOLSYN!
Asa qamqor erekshe meıirimdi Allanyń atymen bastaımyn! Barlyq maqtaý Allaǵa tán. Ardaqty Paıǵambarymyz Muhammedke Allanyń salaýaty men sálemi bolsyn!
Qurmetti baýyrlar!
Qasıetti Qadir keshi múbárak bolsyn! Alla Taǵala ustaǵan orazalaryńyzdy, jasap jatqan qulshylyq-ǵıbadattaryńyzdy qabyl etkeı.
Rasynda, Ramazan aıynyń qasıetti bolýynyń uly erekshelikteriniń biri – Qadir túninde taǵdyrdyń jazylýy. Al Qadir túniniń qasıetti bolýynyń máni – adamzat balasyn eki dúnıe baqytyna jeteleýshi qasıetti kitabymyz Qurannyń túsýi.
Alla Taǵala Quranda: «Biz shynynda, Qurandy Qadir túninde túsirdik. Qadir túniniń ne ekenin bilesiń be? Qadir túni (qasıet jáne saýap jaǵynan) myń aıdan da qaıyrly. Sol túnde perishtiler jáne Jábireıil Allanyń ámirimen (jer betine Alla taǵdyr etken) barlyq isterdi atqarý úshin túsedi. Sol bir tún, aǵaryp tań atqanǵa deıin amandyq-tynyshtyq túni bolady» («Qadir» súresi, 1-5-aıattar) dep baıandaıdy.
Bul súrede Qadir túniniń myń aıdan da qaıyrly ekeni, ıaǵnı osy túnde jasalǵan qulshylyq pen izgi amaldyń saýaby ómir boıy jasalǵan qulshylyqtan artyq bolatyny aıtylǵan. Qasıetti Qurannyń dál osy túni túsýi Qadir túniniń myń aıdan qaıyrly ekenin bildiredi. Sebebi qasıetti Quran adamdy nadandyqtan qutqaratyn, júrekterge tynyshtyq syılaıtyn, pendeni tek jaqsylyqqa bastaıtyn uly kitap. Qadir túni Qurandy kóp oqý, onyń maǵynasyna tereń boılaý arqyly adam óz rýhyn tárbıeleıdi.
Rýhanı kemeldenýdiń mańyzdy sharttarynyń biri – adamnyń óz isine jaýapty ekenin sezinýi. Qadir túni osy jaýapkershilik sezimin kúsheıtedi. Múmin adam óz ómirin qaıta qarap, ótken qatelikterine táýbe etip, bolashaǵyn izgi nıetpen josparlaýǵa den qoıady. Bul – rýhanı damýǵa, óz-ózimizdi tárbıeleýge berilgen múmkindik.
Ardaqty Paıǵambarymyz Ramazannyń sońǵy on kúninde erekshe qulshylyq jasap, otbasyn da izgi amalǵa yntalandyrǵan. Bul túnde namaz ben Quran oqýdyń saýaby mol. Sonymen qatar Alladan kóbirek keshirim surap, duǵa jasaǵan abzal.
Aısha anamyz (oǵan Alla razy bolsyn) ardaqty Paıǵambarymyz Muhammedten (oǵan Allanyń salaýaty men sálemi bolsyn): «Ýa, Allanyń Elshisi, Qadir túninde qandaı duǵa tileıin?» dep suraıdy. Sonda Paıǵambarymyz (oǵan Allanyń salaýaty men sálemi bolsyn): «Alla, rasynda, Sen keshirimdisiń jáne keshirgendi jaqsy kóresiń. Meni keshire górshi» dep aıtasyń» dep jaýap bergen. Taǵy bir hadısterdiń birinde: «Kimde-kim Qadir túni ımanmen jáne saýabyn úmit etip qulshylyq etse, onyń aldyńǵy kúnálary keshiriledi» delingen.
Isi musylman balasynyń taǵdyr jazylatyn túndi taǵatsyzdana kútýiniń bir hıkmeti – Jaratqanǵa jaqyndaı túsýge degen yqylasy. Sondyqtan bul túndi saýapty istermen ótkizýge tyrysaıyq.
Alla Taǵala barshamyzdyń qate-kemshiligimizdi keshirip, óz meıirimine bólegeı. Rabbymyz Qadir keshinde shynaıy ımanmen jasaǵan duǵalarymyzdy, namazdarymyzdy, bergen sadaqalarymyzdy, oqyǵan Quranymyzdy qabyl etip, saýabyn eselep jazǵaı.
Elimiz aman, jerimiz tynysh, Táýelsizdigimiz baıandy bolǵaı! Áýmın!
