«Qaıyrymdy shańyraq» aktsııasy jalǵasýda (FOTO)

«Nur Astana» meshitinde qasıetti juma kúni kóp balaly otbasylar men múgedek jandardy qýantý dástúri jalǵasyp keledi.

Meshit jumysynyń negizgi baǵyttarynyń biri – qaıyrymdylyq. Búgin de qoly ashyq demeýshilerdiń arqasynda 30 muqtaj otbasynyń kóńiline qýanysh uıalady. Buǵan deıin de uıymdastyrylyp júrgen «Qaıyrymdy shańyraq» atty aktsııanyń jalǵasy retinde búgingi ótken sharada «Nur Astana» meshitiniń Bas ımamy Nurlan Ramazanov alǵy sózin sóılep, qaıyrymdylyq sharasyna demeýshilik kórsetken azamattarǵa kópshilik atynan alǵys bildirdi.

«Quran Kárimde «jaqsylyq jáne taqýalyqta (bir-birlerińizge) járdemdesińizder» dep Alla buıyrǵandaı, qasıetti juma kúni meshitimizdiń qaıyrymdylyq isterinde únemi atsalysyp, qarjylaı jáne materıaldyq jaǵynan qoldaý kórsetip júrgen atymtaı jomart, asyl azamattarǵa meshit ákimshiligi atynan alǵys bildiremiz», - dedi.

Sonan soń ishinde kópbalaly jáne múgedek jandar qamtylǵan muqtaj otbasylarǵa kólemdi azyq-túlik pen qarjylaı kómek kórsetildi.