Qaıyrymdylyq jarshylary – Halyqaralyq forýmda

Elordadaǵy Beıbitshilik jáne kelisim saraıynda Memleket basshysy Qasym-Jomart Toqaevtyń qatysýymen Halyqaralyq volonterler forýmy ótip jatyr.

Keshe bastalǵan forýmǵa álemniń 34 elinen 140-tan astam erikti qatysýda. Arasynda QMDB «Zeket jáne qaıyrymdylyq» qorynyń «Qaiyrymdylyq jarshylary» eriktiler toby da bar. Qor dırektory Maqsatbek Maqsotulynyń aıtýynsha, 50-ge jýyq sheteldik spıker volonterler jumysyna qatysty paıdaly aqparattar, keısterdi ortaǵa saldy.

Al forýmnyń negizgi maqsaty – volonterler qozǵalysyn damytý jáne qoldaý salasyndaǵy qazaqstandyq tájirıbeni tanystyryp, halyqaralyq arenada eldiń oń ımıdjin qalyptastyrý.

Resmı málimetterge súıensek, sońǵy úsh jylda elimizde volonterlerdiń sany úsh ese kóbeıdi. Máselen, respýblıkamyzda 2019 jyly volonterlik uıymdardyń sany 50-den astam bolsa, qazirgi tańda 680-ge jetip otyr. Sonymen birge volonterlerdiń sany 2019 jyly 50 myń bolsa, qazir olardyń qatary 200 myńǵa jetip otyr.