QazUÝ Shyǵys Eýropa jáne Ortalyq Azııadaǵy 20 úzdik ýnıversıtet qataryna endi (FOTO)
Ál-Farabı atyndaǵy Qazaq Ulttyq Ýnıversıteti halyqaralyq QS (Quacquarelli Symonds) reıtıngisinde Shyǵys Eýropa jáne Ortalyq Azııadaǵy 20 úzdik ýnıversıtetter qataryna enip otyr. Qazaqstan ýnıversıtetteriniń qara shańyraǵy sanalatyn Ulttyq oqý ordasynyń álemdik ǵylymı-bilim berý keńistiginde de joǵary básekege qabilettiligin halyqaralyq uıymdar saraptamasy dáleldep otyr.
Reıtıng saýalnamalarynda ýnıversıtetter tarapynan júrgizilgen akademııalyq zertteýlerdiń sany jáne álemdik bedeli eskerilgen. Aıta keteıik, atalmysh reıtıngte QazUÝ 19-oryndy ıemdengen. Al, Shyǵys Eýropa men Ortalyq Azııanyń úzdik 300 joǵary oqý oryndarynyń qataryna qazaqstandyq 25 ýnıversıtet qana engen eken.
Ál-Farabı atyndaǵy Qazaq ulttyq ýnıversıteti – ózindik salt-dástúrimen baı, kópjyldyq bilim salasyndaǵy jáne ǵylymı jumystarda tájirıbesi mol birden-bir joǵary oqý orny. Ýnıversıtet quramynda 16 fakýltet, 67 kafedra, 32 ǵylymı-zertteý ınstıtýty men ortalyqtar, tehnopark qyzmet atqarady: 2000-nan astam professor, doktorlar, ǵylym kandıdattary men fılosofııa doktorlary, 100-den astam akademııalardyń akademıkteri, 30-ǵa jaqyn Qazaqstan Respýblıkasyna eńbek sińirgen qaıratkerleri, 30-dan astam Qazaqstan Respýblıkasynyń memlekettik jáne ataýly syılyǵynyń laýreattary, sondaı-aq 40 jas ǵalymdar syılyǵynyń laýreattary men 45 memlekettik ǵylymı stıpendııalardyń stıpendıanttary eńbek etedi. Ýnıversıtette 25 myńnan astam bilimger men kópsalaly joǵary kásibı bilim júıesi boıynsha magıstranttar bilim alýda. Bakalavrıatta - 87, magıstratýrada – 98, doktorantýrada – 83 mamandyq bar.
