QMDB "ARDAGERLER UIYMY" RESPÝBLIKALYQ QOǴAMDYQ BIRLESTIGIMEN MEMORANDÝMǴA OTYRDY

Astanada Qazaqstan musylmandary dinı basqarmasy men «Ardagerler uıymy» respýblıkalyq qoǵamdyq birlestigi arasynda ózara yntymaqtastyq týraly memorandýmǵa qol qoıý rásimi ótti.

Is-sharaǵa QMDB Tóraǵasy, Bas múftı Naýryzbaı qajy Taǵanuly, Respýblıkalyq ardagerler uıymy Ortalyq keńesiniń tóraǵasy Ábilǵazy Qusaıynov, Ortalyq keńes tóraǵasynyń Birinshi orynbasary Abaı Tasbolatov jáne qos tarap ókilderi qatysty.

Memorandýmnyń negizgi maqsaty – qoǵamnyń rýhanı-adamgershilik damýyna úles qosý, din men dástúr sabaqtastyǵyn dáripteý, ulttyq qundylyqtardy saqtaý jáne urpaqtar arasyndaǵy rýhanı baılanysty nyǵaıtý baǵytynda eki uıymnyń ózara áriptestigin damytý.

Qujat aıasynda din qyzmetkerleri men ardagerlerdiń áleýetin biriktirý, jastar tárbıesine birlese atsalysý, otbasylyq qundylyqtardy nasıhattaý, ımandylyq pen adamgershilik qaǵıdattaryn qoǵamda keńinen ornyqtyrý máseleleri talqylandy.

Sonymen qatar óńirlerdegi meshit ımamdary men ardagerler uıymdarynyń ókilderi arasynda turaqty baılanys ornatyp, birlesken rýhanı-tanymdyq jáne tárbıelik is-sharalar ótkizý josparlandy.

Jıyn sońynda QMDB Tóraǵasy meımandarǵa óziniń jaqynda jaryq kórgen «Islam jáne adal qoǵam» kitabyn tabystady.

​