QMDB: Aıttyń ekinshi kúninde 33 981 otbasyǵa qurbandyq eti úlestirildi (FOTO)
Qasıetti Qurban aıttyń ekinshi kúninde de elimiz boıynsha qurban shalý rásimine qatysty uıymdastyrý-úılestirý jumystary júıeli túrde ótti.
Úılestirý jumystaryna bekitilgen QMDB jáne meshit qyzmetkerleri óz mindetterin tıisti deńgeıde oryndady.
Musylman qaýymynyń ulyq meıramynda qaıyrymdylyq sharasyn jandandyra túsý maqsatynda qurylǵan arnaıy jumys toby Qurban aıttyń ekinshi kúni respýblıka boıynsha 6578 qoı, 618 eshki, 456 iri qara men 11 túıe soıylsa, 33 981 muqtaj otbasyǵa qurbandyq eti jetkizildi.
Sondaı-aq elimiz boıynsha www.qurban2022.kz saıtyna qashyqtan qurban shalýǵa tapsyrys bergen azamattardyń ýákildik qurbandyǵy da oıdaǵydaı oryndaldy. Aıttyń ekinshi kúni qurban2022.kz saıty arqyly qurban shalýǵa 1 591 tapsyrys kelip tússe, 1149 qoı, 239 eshki, 36 iri qara jáne 7 adam birigip shalý boıynsha 170 iri qara soıylypty. Osy ýákildik qurbandyǵynyń esebin qajet etken jandarǵa atqarylǵan is-sharalardyń foto, vıdeo málimeti jiberildi.
Eske salaıyq, aıttyń birinshi kúni (09.07.2021) QMDB-nyń aımaqtaǵy ókildikteri kómekke zárý 46 807 otbasyǵa qurbandyq etin jetkizip, merekelik qýanyshqa bólegen bolatyn. Jalpy alǵanda, ıaǵnı, barlyq oblysty qamtyǵanda Qurban aıttyń eki kúninde 80 788 januıaǵa et jetkizildi.
Osy oraıda Qazaqstan musylmandary dinı basqarmasynyń qaıyrymdylyq sharasyna belsendi túrde atsalysyp, muqtajdyń muńyn bólisip, saýapqa úles qosqan barsha azamattarǵa, sondaı-aq jekelegen kásiporyndar men uıymdardyń basshylaryna aıryqsha alǵys aıtamyz.
Alla Taǵala jasaǵan qaıyrymdylyqtyń qaıyryn ózderińizge eselep qaıtarsyn degen duǵa-tilektemiz.
