QMDB «DIN MEN DÁSTÚR» BÓLIMINE JAŃA MEŃGERÝShI TAǴAIYNDALDY

Búgin Astana qalasynda ótken Qazaqstan musylmandary dinı basqarmasy Tóralqa májilisinde kadrlyq taǵaıyndaý boldy.

QMDB Tóraǵasy, Bas múftı Naýryzbaı qajy Taǵanulynyń buıryǵymen osy ýaqytqa deıin Astana qalasynyń jáne «Áziret Sultan» meshitiniń Bas ımamy qyzmetin atqaryp kelgen Erbolat Nuryldauly Júsipov Qazaqstan musylmandary dinı basqarmasynyń «Din men dástúr» bóliminiń meńgerýshisi bolyp taǵaıyndaldy.

Bas múftı jıyn barysynda Erbolat Nuryldaulynyń dinı saladaǵy kópjyldyq tájirıbesine toqtalyp, onyń halyqpen jumys júrgizýde, ulttyq qundylyqtar men asyl dinimizdiń sabaqtastyǵyn nasıhattaýda eleýli eńbek etkenin atap ótti.

Sondaı-aq QMDB Tóraǵasy «Din men dástúr» baǵytynyń halqymyzdyń rýhanı bolmysyn saqtap, ulttyq qundylyqtardy dáripteýdegi mańyzyna nazar aýdaryp, jańa qyzmet ıesine jaýapty mindetter júkteletinin jetkizdi.

Aıta keteıik, buǵan deıin «Din men dástúr» bóliminiń  meńgerýshisi bolǵan Nurbek Áýeshanuly Bas múftı Naýryzbaı qajy Taǵanulynyń buıryǵymen Astana qalasynyń Bas ımamy bolyp taǵaıyndalǵan bolatyn.