QMDB ǴULAMALAR KEŃESINIŃ 44-MÁJILISI BASTALDY (FOTO)
Búgin Astana qalasynda Bas múftı Naýryzbaı qajy Taǵanulynyń tóraǵalyǵymen QMDB janyndaǵy Ǵulamalar keńesiniń 44-májilisi bastaldy.
Keńes jumysyn ashqan QMDB Tóraǵasy: «Allaǵa shúkir, Ǵulamalar keńesiniń jumysy joǵary deńgeıde ótip keledi. Sonyń nátıjesinde qoǵamǵa paıdaly, ózekti pátýalar jarııalandy. Tıisti kontseptýaldy qujattar qabyldandy. Ózderińizge belgili, «Islam jáne dástúr qundylyǵy» jyly aıasynda birneshe Respýblıkalyq, halyqaralyq sharalar, konferentsııalar, semınarlar ótkizdik. Ózderińizdiń qatysýlaryńyzben «Babalar izimen: Qazaq dalasyndaǵy musylmandyq mektep», «Din men dástúr» kitabynyń III tomy jáne birneshe ýaqyttan beri qolǵa alǵan ǵylymı jobamyz «Islam Entsıklopedııasy» kitabynyń I tomynyń tusaýyn kestik.
Rasynda da bul kitaptardyń qoǵam úshin paıdasy mol. Atalǵan kitaptarǵa sizder de úlken úles qostyńyzdar. Kóp eńbek jasadyńyzdar. Osy oraıda atsalysqan barshańyzǵa Alla razy bolsyn degim keledi» dedi.
Aıta keteıik, búgin májiliste «Kıberbýllıngtiń sharıǵattaǵy úkimi», «Kvadroberdiń sharıǵattaǵy úkimi», «Diń jasýshalary donorlyǵynyń úkimi», «Denege naqysh (tatýırovka) salýdyń úkimi» jáne «Jol júrý erejesin saqtaýdyń úkimi» taqyrybynda ázirlengen pátýalardyń mazmuny talqylanýda. Qabyldanǵan pátýalardyń mátini múftııattyń resmı aqparat quraldarynda jarııalanady.
