QMDB MÁLIMDEMESI
«Mýzyka – haram, al ánshiler – shaıtannyń azanshysy» degen mazmunda toıda pikir bildirgen adamnyń sózi áleýmettik jelide keńinen tarap, qoǵam arasynda túsinbeýshilik týǵyzýda.
Islam dini danalyqpen nasıhat aıtýǵa, ózgelerdi aýyr sózben aıyptamaýǵa, bireýdiń ar-namysyna qurmetpen qaraýǵa úndeıdi. Sondyqtan qandaı da dinı máselege qatysty óner ókilderin jalpylama aıyptaý nemese olarǵa aýyr sıpattamalar berý durys emes. Sonymen qatar analarymyzdy, qyz-kelinshekterdi beıádep sózben kemsitý de óreskel qatelik dep sanaımyz.
Adamdy arsyzdyqqa, azǵyndyqqa jáne sharıǵat tyıym salǵan isterge úndeıtin ánderdi dinimiz quptamaıdy. Alaıda dinimiz ben dástúrimizdiń asyl qundylyqtaryn dáripteıtin, Otandy qorǵaýǵa, ata-anany qadirleýge úndeıtin, adamgershilik pen izgilikke shaqyratyn ánderge ruqsat beriletini jaıynda Islam ǵalymdarynyń pikiri bar.
Qazaqstan musylmandary dinı basqarmasy elimizdegi musylman qaýymyn, barsha halyqty árqashan ózara qurmetke, parasatqa, kórkem minezge jáne birlikke úndep keledi. Osy rette taǵy da el azamattaryn sóz jaýapkershiligine den qoıýǵa, dinı máselelerde tek resmı dinı qyzmettegi bilikti ǵalymdardyń túsindirmesine súıenýge jáne qoǵamnyń aýyzbirshiligin saqtaýǵa shaqyramyz.
Alla Taǵala halqymyzdyń aýyzbirshiligin arttyryp, rýhanı tutastyǵyn bekem etkeı.
