QMDB: Qurban aıttyń birinshi kúni 46 807 otbasyǵa et taratyldy (FOTO)

Qazaqstan musylmandary dinı basqarmasynyń qoǵam aldyndaǵy negizgi qyzmetiniń biri – qaıyrymdylyq sharalaryn uıymdastyrý. QMDB kómekke muqtaj jandardy qoldaý maqsatynda bıyl da qurban shalýdy oflaın jáne WWW.QURBAN2022.KZ saıty arqyly onlaın júzege asyryp otyr.

Qurban aıttyń alǵashqy kúni, ıaǵnı, 9 shildedegi málimet boıynsha respýblıka kóleminde jalpy sany 14 435 mal shalynsa, 2600-ge jýyq tapsyrys qurban2022.kz saıty arqyly berilgen. Tarqatyp aıtsaq, qoı – 12 786, eshki – 845, iri qara – 796, túıe – 8. Barlyq málimetti jınaqtap aıtqanda, elimiz boıynsha 46 807 otbasyǵa qurbandyq eti taratyldy.

Eske sala keteıik, onlaın formatta qurban shalýǵa qurban2022.kz saıty arqyly tapsyrys berý aıttyń úshinshi kúni, ıaǵnı, erteń (11 shilde) saǵat 16:00-ge deıin jalǵasady.

Halqymyzda «Qaıyrymdylyq jasasań, qaıyryn óziń kóresiń» degen naqyl sóz bar. Alla Taǵala shynaıy nıetpen qurban shalyp, muqtaj otbasylarǵa merekelik qýanysh syılap, saýapty iske ortaqtasqany úshin barlyq azamatqa razy bolǵaı! Aıt qutty bolsyn, aǵaıyn!