QMDB TÓRAǴASY ÁL-AZHAR ÝÁKILIMEN SUHBATTASTY (FOTO)
QMDB Tóraǵasy, Bas múftı Naýryzbaı qajy Taǵanuly Indonezııaǵa issapary barysynda ál-Azhar ýákili sheıh Muhammed ad-Dýınımen kezdesti.
Kezdesýde Qazaqstan men Mysyr arasyndaǵy rýhanı baılanys sóz boldy. Óz kezeginde Bas múftı ál-Azhar ýákiline qazaqstandyq shákirtterge kórsetken qoldaýy úshin alǵysyn jetkizdi.
«Qurmetti sheıh Sizdi kórgenime qýanyshtymyn. Biz dinı bilim berýdiń jańa úlgisin jasap, 2027 jylǵa deıingi damý josparyn bekittik. Biz úshin ál-Azhar ýnıversıtetiniń orny bólek. Qazirgi ýaqytta Astanada ashylǵan ımamdardyń bilimin jetildirýge arnalǵan Hýsamýddın ás-Syǵanaqı atyndaǵy ınstıtýtta mysyrlyq ustaz sabaq berip jatyr. Bul – úlken qoldaý. Bıyl Alla qalasa Beıbarys sultan babamyzdyń 800 jyldyǵyn elimizde jáne Mysyrda joǵary deńgeıde atap ótpekpiz. Bul mereıtoı ortaq dep bilemin» deı kele Bas múftı Mysyr tarapynan kórsetilgen qoldaýǵa alǵysyn jetkizdi.
Ýákil óz kezeginde Mysyr tarapy qoldaý kórsetýge árkez daıyn ekenin jetkizip, jaqynda elordaǵa taǵy da eki ustaz jiberetinin aıtty.
Kezdesý sońynda QMDB Tóraǵasy, ál-Azhar ýákiline qurmet kórsetip, kádesyı tabystady.
