QMDB TÓRAǴASY «ÁZIRET SULTAN» MEShITINDE JUMA NAMAZYN JÚRGIZDI (FOTO)
Búgin Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly elordadaǵy respýblıkalyq «Áziret Sultan» meshitte «Dindegi ustamdylyq» taqyrybynda juma ýaǵyzyn aıtty.
«Jaratqan Alla qasıetti Quranda: «Qolynyń qysqalyǵynan úılene almaǵandar, Alla óziniń sheksiz sharapatymen olardy qamtamasyz etkenge deıin ustamdylyq tanytsyn», – degen («Nur» súresi, 33-aıat).
Ardaqty Paıǵambarymyz (oǵan Allanyń salaýaty men sálemi bolsyn) óziniń hadısinde: «Ýa, Allam! Rasynda, men Ózińnen týra jolyńdy, taqýalyqty, ustamdylyqty jáne eshkimge muqtajdyq qylmaýyńdy suraımyn», – dep aıtatyn (ımam Múslım).
Ustamdylyq – adamnyń rýhanı kemeldený joly. Ol nápsini tártipke salyp, júrekti tazalyqqa, minezdi kórkemdikke jeteleıdi. Ustamdylyqty ómirlik ustanym etken jan ar-namysyn qorǵaıdy, ımanyn kúsheıtedi ári qoǵamda izgilik pen senimniń úlgisine aınalady, – degen»,- dedi Naýryzbaı qajy Taǵanuly.
Juma namazynan keıin Bas múftı meshit jamaǵatymen birge el amandyǵy men tynyshtyǵy úshin duǵa jasady.
