QMDB TÓRAǴASY ÁZIRET SULTAN MEShITINDE JUMA ÝAǴYZYN AITTY

Búgin Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly elordadaǵy «Áziret Sultan» meshitinde «Allany kórip turǵandaı qulshylyq jasaý» taqyrybynda juma ýaǵyzyn aıtty. 

«Allany kórip turǵandaı qulshylyq jasaý» degen uǵym ıslam dininde «Ihsan» dep atalady. Bul ilim de dinniń negizgi tiregi sanalady. Iaǵnı dinimizde ıhsan úsh negizdiń biri retinde qaralady, olar: ıman (senim), ıslam (amal), ıhsan (shynaıylyq). Iman júrektegi senim bolsa, ıslam – sol senimdi is-áreketpen dáleldeý degen sóz. Al ıhsan sol amaldardy eń kórkem túrde, taza nıetpen oryndaýdy bildiredi. Aıtalyq, bir adamnyń namaz oqyǵan kezde, ony shyn yqylaspen Allanyń quzyrynda turǵanyn sezinip oqýy, sol sııaqty bireýge kómekteser bolsa, maqtaný úshin emes, shynaıy meıirimmen kómektesýi, mine, bul ıhsan ilimine jatady.

«Ihsan» sóziniń tildik maǵynasy «jaqsylyq», «ıgilik» degen uǵymdy bildirse, sharıǵattaǵy maǵynasy bir isti qolǵa alǵanda ony «eń ádemi, kemel túrde jasaý» degendi bildiredi. Ihsan – pendeniń ımanyn bekemdep, qulshylyqqa degen qulshynysyn arttyratyn, adamgershilikke tán ıgi qasıetterdi kemeldendire túsetin rýhanı ilim. Qudireti kúshti Alla Taǵala Quran Kárimde erekshe mán bergen qundylyqtyń biregeıi osy – ıhsan ilimi.

Alla Taǵala Qasıetti Quranda: «Negizinde Alla ádildikti, ıgilikti (ıhsandy) jáne aǵaıynǵa qaraılasýdy buıyrady. Sondaı-aq arsyzdyqtan, jamandyqtan jáne zorlyq-zombylyqtan tyıady. Túsinersińder dep senderge (osylaısha) nasıhat beredi», – deıdi («Nahl» súresi, 90-aıat)»,- dedi Naýryzbaı qajy Taǵanuly.

Juma namazynan keıin Bas múftı meshit jamaǵatymen birge el amandyǵy men tynyshtyǵy úshin duǵa jasady.

​