QMDB TÓRAǴASY BAIaN-ÓLGEIDEGI ZIIaLY QAÝYM ÓKILDERIMEN SUHBATTASTY
![](/img/news/ebbc5338fe2eb321687389cd90bc263d.jpg)
Qazaqstan musylmandary dinı basqarmasynyń tóraǵasy Naýryzbaı qajy Taǵanuly Mońǵolııaǵa barǵan saparynda Baıan-Ólgeı qalasynda zııaly qaýym ókilderimen kezdesti.
Basqosýǵa jazýshylar men aqyndar, buqaralyq aqparat quraldary ókilderiniń jetekshileri, sonymen qatar Baıan-Ólgeı aımaǵynyń Azamattyq ókilderi quryltaıynyń tóraǵasy Qabyl Sháripuly qatysty.
Kezdesýde sóz alǵan Bas múftı: «Ózderińizge belgili, ótken jyly Baıan-Ólgeıde qazaqtardyń IV kishi quryltaıy ótti. Atalǵan quryltaı Mońǵolııa men Qazaqstan qatynastaryna, onyń ishinde 100 myńnan asa qazaq shoǵyrlanǵan Baıan-Ólgeı aımaǵyndaǵy qandastarymyzben rýhanı baılanys ornatýǵa eleýli úles qosty.
Alqaly jıynǵa quttyqtaý hatyn joldaǵan Memleket basshysy qadirli Qasym-Jomart Kemeluly Altaıdyń arǵy betin mekendegen qandastarymyz ulttyq bolmysyn, tili men salt-dástúrin saqtaǵan irgeli jurt bolyp otyrǵanyn, bul alystaǵy aǵaıynnyń tamyry berik, rýhy bıik ekenin bildiretinin atap ótti. Prezıdentimiz aıtqandaı, bul baýyrlas Mońǵol eliniń qazaq halqyna shynaıy tileýlestigin jáne eki el dostyǵynyń tamyry tereńge jaıǵanyn kórsetedi» dedi.
QMDB Tóraǵasy óz kezeginde Dinı basqarma shettegi qandastarymyzǵa, ımamdarǵa árqashan qoldaý kórsete beretinin jetkizdi. Bas múftı basqosý barysynda zııaly qaýym ókilderine, kitaphana ujymyna «MUFTIYAT» baspasynan shyqqan kitaptardy syıǵa tartty.
Kezdesýde Baıan-Ólgeı aımaǵynyń Azamattyq ókilderi quryltaıynyń tóraǵasy Qabyl Sháripuly Bas múftı Naýryzbaı qajy Taǵanulyn «Qurmet» tósbelgisimen marapattady.