Imamdardyń janqııarlyq jumystarynyń arqasynda elimizde jyl saıyn 500-den astam azamat destrýktıvti aǵymnan bas tartyp, dástúrli dinimizben qaýyshyp keledi. Bul týraly QMDB tóraǵasy, bas múftı Serikbaı qajy Oraz Qazaqstan Dintanýshylarynyń IH forýmynda málimdedi.
Onyń aıtýynsha, dinı basqarma óziniń kúndelikti san-salaly qyzmeti barysynda basty 4 baǵyt boıynsha jumystarynyń biri retinde destrýktıvti aǵymdarǵa túsindirý sharalaryn bir sátke de toqtatpaıdy.
"Ońaltý sharalaryna qatysty taǵy bir tásil – tarıhpen tárbıeleý. Tarıh degenimiz – adamzatttyń qoǵamdyq jady, ózin-ózi tanýy, ótken ómirdiń sanada jańǵyrýy. Ǵulamalar: «Adam oıyn oıatqyń kelse – onyń tarıhyn oıat», – degen tálimdi sóz aıtqan",- dedi Bas múftı.
Sondaı-aq, QMDB tóraǵasy forýmda óziniń úsh usynysyn ortaǵa saldy.
"Birinshiden, «Tarıh jáne dinı sana» jobasyn birlese júzege asyrýdy usynamyn. Tarıhı nysandar men oryndarǵa jasalatyn josparly sapar jamaǵattyń tanym kókjıegin keńeıtip, ıntellektýaldyq deńgeıin arttyrady. Bul rette Túrkııa tájrıbesin alýǵa bolady. Ekinshiden, qoǵamnyń aǵartýshy tobyna jatatyn ımamdardyń janqııarlyq qyzmetin eskerip, olarǵa áleýmettik turǵydan qoldaý jasalsa. Ásirese, 100-ge jýyq túzeý mekemelerinde jumys jasaıtyn din qyzmetkerine turaqty jalaqy taǵaıyndalsa. Bul adam taǵdyryna jýapkershilikpen qarap, esep úshin emes, eldiń ıgiligi jolynda qyzmet etip júrgen din qyzmetkerine kórsetilgen qamqorlyq, ádil baǵa bolar edi. Úshinshiden, aqsaqaldar ınstıtýtynyń rólin kúsheıtý – mańyzdy másele. Biz – qarııanyń dýaly sózine qarsy ýáj aıtpaǵan halyqpyz. Bul – sanaǵa sińgen saltymyz. «Qoı deıtin qoja» bola bilgen qanshama qarııalarymyz jat aǵamǵa ketken jastarǵa nasıhat aıtyp, tárbıesin túzep keledi. Osy baǵytta oblystyq meshit janyndaǵy Aqsaqaldar alqasy men aýyl, aýdandaǵy bıler keńesi úlken qural bola alady", — deıdi.
