QMDB TÓRAǴASY EÝROPADAǴY QAÝIPSIZDIK JÁNE YNTYMAQTASTYQ UIYMYNYŃ ÓKILDERIN QABYLDADY
Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanuly Eýropadaǵy qaýipsizdik jáne yntymaqtastyq uıymynyń (EQYU) ókilderin qabyldady.
Kezdesýge EQYU-nyń Dıalog jáne senim sharalary jónindegi arnaıy ókili Serj Rýmın, Shveıtsarııanyń Qazaqstandaǵy Elshisi Krıstın Honegger Zolotýhın, Astanadaǵy EQYU Baǵdarlamalar keńsesi basshysy Alekseı Rogov jáne EQYU Hatshylyǵynyń medıatsııany qoldaý jónindegi mamany Lara Grýben qatysty.
Kezdesý barysynda taraptar dinaralyq jáne konfessııaaralyq kelisimdi nyǵaıtý, qoǵamdaǵy ózara túsinistik pen senim mádenıetin qalyptastyrý, sondaı-aq beıbitshilik pen turaqtylyqty saqtaý máseleleri jóninde pikir almasty.
Bas múftı Qazaqstanda túrli din ókilderi arasyndaǵy ózara qurmet pen kelisimniń qalyptasqanyn atap ótip, bul baǵytta Qazaqstan musylmandary dinı basqarmasynyń atqaryp jatqan jumystaryna toqtaldy. Sonymen qatar dinı qundylyqtardy dáripteý, jastardyń rýhanı tárbıesi jáne qoǵamdaǵy tatýlyqty nyǵaıtýǵa baǵyttalǵan bastamalar týraly aıtty.
Óz kezeginde EQYU ókilderi Qazaqstannyń beıbitshilik pen dıalogty damytýdaǵy tájirıbesine toqtalyp, dinı uıymdardyń qoǵamdaǵy kelisimdi nyǵaıtýdaǵy mańyzdy rólin atap ótti.
Kezdesýde dıalog alańdaryn damytý, medıatsııa men ózara senim tetikterin jetildirý, sondaı-aq ortaq qundylyqtar negizinde yntymaqtastyqty arttyrý máseleleri talqylandy.
Kezdesý sońynda taraptar beıbitshilik, ózara túsinistik pen qoǵamdyq kelisimdi nyǵaıtýǵa baǵyttalǵan ózara baılanystardy jalǵastyrýǵa nıetti ekenin bildirdi.
