QMDB tóraǵasy qos kitaptyń tusaýkeser rásimine qatysty (FOTO)
Qazaqstan Respýblıkasynyń Ulttyq akademııalyq kitaphanasynda Halyqaralyq Túrki akademııasynyń uıymdastyrýymen tanymal ǵalym, kórnekti memleket jáne qoǵam qaıratkeri Myrzataı Joldasbekovtyń «Uly Dala ádebıeti» jáne «Qorqyt Ata kitaby» kitaptarynyń tanystyrý rásimi ótti.
Alqaly jıynǵa Memlekettik hatshy Qyrymbek Kósherbaev, Premer-mınıstrdiń orynbasary Berdibek Saparbaev, memleket jáne qoǵam qaıratkeri Ómirbek Báıgeldi, Túrkııa Elshisi Nevzat Ýıanyk, Ázerbaıjan Elshisi Rashad Mamedov, Halyqaralyq Túrki akademııasynyń prezıdenti Darhan Qydyráli, Qazaqstan halqy assambleıasy Tóraǵasynyń birinshi orynbasary Janseıit Túımebaev, Senat depýtaty Baqytjan Jumaǵulov, Májilis depýtattary Baqytjan Ertaev, Saýytbek Abdrahmanov, Túrki keńesi aqsaqaldar keńesiniń múshesi Ádil Ahmetov, Qazaqstan musylmandary dinı basqarmasynyń tóraǵasy, Bas mýftı Serikbaı qajy Oraz, zııaly qaýym ókilderi men ǵalymdar, birqatar BAQ basshylary qatysty. Basqosýdy júrgizip otyrǵan Túrki akademııasynyń basshysy Darhan Qydyráli akademık Myrzataı Joldasbekovtiń el táýelsizdiginiń qalyptasýy kezeńinen beri memleket qaıratkeri, bilikti dıplomat ekendigimen qosa, túrkologııa salasyna ólsheýsiz eńbek sińirgen kórnekti ǵalym ekenin de atap ótti.
Alqaly jıynda sóz alǵan Bas múftı Serikbaı Satybaldyuly: «Uly Dala ádebıeti» kitabyna Myrzataı Joldasbekulynyń sanaly ǵumyryn arnaǵan júıeli zertteý eńbekteri toptastyrylǵan eken. Al «Qorqyt ata kitaby» basylymynda avtor kitaptyń áıgili Drezden nusqasyn tuńǵysh ret qazaq tiline túpnusqadan tolyq aýdaryp, transkıptsııasy men sózdigin qosa usynǵan. Meniń oıymsha, bul eńbekter dini men dástúrin saqtap, el úmitin aqtaıtyn jas býynnyń rýhanı ómiriniń shamshyraǵy bolady dep esepteımin», – dedi.
