QMDB TÓRAǴASY ShETELDIK DELEGATsIIaNY QABYLDADY (FOTO)

Búgin Almatyda Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly «HALAL EXPO-2023» halyqaralyq kórmesi aıasynda Sheteldik halal standarttaý jáne sertıfıkattaý ortalyqtary basshylaryn qabyldady.

Kezdesýde halal standarty men sertıfıkattaý máseleleri talqylandy.

«Halal men haram uǵymy qansha ǵasyr ótse de, órkenıet, tehnologııa qaryshtap damysa da, ózgermek emes. Óıtkeni Alla Taǵala Quran Kárimde, Paıǵambarymyzdyń (oǵan Allanyń salaýaty men sálemi bolsyn) hadısterinde buǵan qatysty úkim bekitilip qoıǵan. Astyń adaldyǵy aldymen ony qandaı jolmen tapqanǵa baılanysty bolsa, ekinshi sıpaty onyń quramyna qatysty. Sizder halal standartymen jumys isteıtindikten ony óte jaqsy bilesizder. Qurlyqtaǵy, sýdaǵy qaı janýardyń eti men súti, tipti terisini deıin halal ma, haram ba, bul jóninde málimet kóp. Quran-hadısterde ol ashyq aıtylǵan. Qazirgi tańdaǵy taǵamdarǵa qatysty mańyzdy másele – tamaq ónerkásibiniń jumys protsesi. Iaǵnı, taǵamǵa qosylatyn et óniminiń qandaı janýar jáne onyń sharıǵat jolymen soıylýy, dámin, túsin, túrin ózgertetin túrli qospalardyń quramynyń taza bolýy mańyzdy. 

Jáı kózge kórine bermeıtin taǵam quramyndaǵy tazalyqqa mán berip, «halal» tańbasynyń jaýapkershiligin, musylman jamaǵatynyń amanatyn arqalap júrgen barshańyzǵa Alla razy bolsyn. Ózderińizben halal salasyndaǵy birlesken jumysymyzdy jalǵastyra beremiz» dedi Bas múftı.

Óz kezeginde sheteldik meımandar QMDB Tóraǵasyna halyqaralyq kórmege shaqyrǵany úshin alǵys bildirip, osy salada birigip is atqarýǵa ýaǵdalasty.