QMDB TÓRAǴASY ÚSh MEShITKE QYZMETTIK AVTOKÓLIKTIŃ KILTIN TABYSTADY

Qazaqstan musylmandary dinı basqarmasynyń tóraǵasy Naýryzbaı qajy Taǵanuly Aqtóbe oblysyna barǵan jumys saparynda múftııattyń 35 jyldyq mereıtoıyna oraı din janashyrlary men kásipkerlerdiń demeýshiligimen Aqtóbe qalalyq ortalyq meshitine, Hromtaý aýdandyq «Nur» meshitine jáne Baıǵanın aýdandyq ortalyq meshitine alynǵan qyzmettik jańa avtokóliktiń kiltin tabystady.

Bas múftı jańa avtokólikti meshitke ýaqyp etken, ıaǵnı múlikti ıgi ister úshin meshitke arnaıy syıǵa tartqan kásipker azamattarǵa aıryqsha alǵysyn bildirip, rızashylyq nıetin jetkizdi.

Aıta ketsek, asyl dinimizde qaıyrymdylyqtyń eń abzaly – ýaqyp jasaý. Sharıǵatta «ýaqyp» sózi belgili bir múlikti jaramsyz bolǵanǵa deıin Alla jolynda turaqty túrde paıdalaný maqsatynda arnaý degendi bildiredi.
Bul avtokólikter meshittiń dinı-aǵartýshylyq jumystaryn jandandyryp, shalǵaı aýyldarǵa jetýge, áleýmettik kómek pen qaıyrymdylyq sharalaryn tıimdi uıymdastyrýǵa múmkindik beredi. Ýaqyp arqyly júzege asyp jatqan mundaı bastamalar qoǵamda aýqymdy qaıyrymdylyq mádenıetin qalyptastyrýǵa yqpal etpek.