QMDB: Túrkistanda múftııattyń fılıaly ashylady (FOTO)
Túrkistan qalasynda Qazaqstan musylmandary dinı basqarmasynyń arnaıy fılıaly ashylatyn boldy.
Keshe Astanada Bas múftı Serikbaı qajy Orazdyń tóraǵalyǵymen ótken QMDB-nyń kezekten tys Tóralqa májilisinde osyndaı sheshim qabyldandy. Alqaly jıynǵa QR Din isteri komıtetiniń tóraǵasy Erkin Ońǵarbaev, Birinshi naıb múftı Naýryzbaı qajy Taǵanuly, naıb múftıler – Alaý Ádilbaı, Baýyrjan Esmahan, QMDB apparat basshysy Ǵylymbek Májıev, oblystyń bas ımamdary qatysty.
«Túrkistan – muqym túrki jurtynyń temirqazyǵy, túrki musylmandyǵynyń ordasy, alty Alashtyń júregi! Túrkistan – babalar qaldyrǵan kıeli amanat, asyl dińgegimiz, rýhanı kindigimiz! Osynaý qasıetti jerde halqymyzdyń rýhanııaty úshin qyzmet etetin Qazaqstan musylmandary dinı basqarmasynyń arnaıy ókildigin ashýdy josparlap otyrmyz. Bul ortalyq Túrkistan óńiriniń odan ári rýhanı damýyna qyzmet etip, rýhanı astana mártebesiniń tereńdeı túsýine súbeli úlesin qosatyn bolady», – dedi Serikbaı qajy Oraz.
Óz kezeginde sóz alǵan QR Din isteri komıtetiniń tóraǵa orynbasary Balǵabek Myrzaev:
«Túrkistan ejelden túrki áleminiń rýhanı ortalyǵy bolyp kelgen. Qazaqstan Respýblıkasy Prezıdenti – Elbasymyz N.Á. Nazarbaevtyń Túrkistan ataýyn qaıta jańǵyrtýy – ısi túrki halyqtary qalaǵan ıdeıany júzege asyrýynyń kórinisi dep aıta alamyz. Osyndaı kıeli jerde QMDB fılıalynyń ashylýy – elimizdegi rýhanı salanyń damı túsýine ózindik oń yqpalyn tıgizedi degen senimdemin», – dedi.
Tóralqa májilisiniń músheleri Bas múftıdiń Túrkistanda múftııattyń ókildigin ashý týraly usynysyn biraýyzdan qoldap, oń pikirlerin bildirdi.
