Qostanaıda «Mýslıma» halal dámhanasy ashyldy (FOTO)
Qostanaı qalasyndaǵy halal qoǵamdyq tamaqtaný oryndarynyń biri – «Mýslıma» dámhanasynyń resmı ashylý saltanaty ótti. Dámhananyń ashylý rásimine «Halal Damý» dırektory Aıbek Asqarbekuly, oblystyń bas ımamy Bahytbek Nurǵabyluly jáne jergilikti ınspektor-kontroler Alısher Balahmet qatysty.
Aıbek Asqarbekuly kásiporyn basshylyǵyna «QMDB Halal» sertıfıkatyn jáne dámhana qasapshysyna «QMDB Halal qasapshy» kýáligin tabystady.
«Halal sheńberiniń aıasy keń. Onyń bir salasy musylman jurtshylyǵynyń as-aýqat, taǵamyna qatysty. Halyq kóp tutynatyn, suranysqa ıe tamaqtaný oryndary men azyq-túlikter halal standarty boıynsha sertıfıkattalǵanda erekshe qýanamyz. Sebebi bizdiń basty maqsatymyz – eń birinshi kezekte halyq qajettiligin qamtamassyz etý. Oblystyq kásipkerlerdiń bastamasymen ashylyp otyrǵan halal dámhana – adal, taza as-aýqatty usynyp qana qoımaı, otbasymen tynyǵyp, kóńil sergitip, demalý úshin barlyq qolaılylyqty oılastyrǵan. Osy baǵyttaryńyzdan taımaı, elge adal as usynyp, kóńilderdi qýanta beresizder dep senemin. Bizdiń birlesken jumysymyz osy jerden toqtamaıdy, kerisinshe endi ǵana bastaý aldy. Aldaǵy ýaqytta tehnologtar men ınspektor-kontroler mamandardyń qatysýymen mindetti aılyq tekseris jumystary turaqty túrde júrgiziledi» degen Aıbek Asqarbekuly dámhana ıeleri men qyzmetkerlerine alǵysyn bildirip, kásipterine bereke tiledi.
Óz kezeginde «Mýslıma» kásiporny «Halal Damý» mamandary qyzmetin joǵary baǵalap, «QMDB halal» tańbasyna laıyqty jumys jasaıtynyn jetkizdi.
Barlyq zertteý jáne baqylaý jumystarynyń oń nátıjıesinen keıin «Mýslıma» dámhanasy «Tamaqtandyrý qyzmetteri», «Halal ónimderdi óndirý, óńdeý, daıyndaý, saqtaý, tasymaldaý jáne satýǵa qoıylatyn jalpy standart» talaptaryna laıyq dep tanyldy. Qostanaı qalasyndaǵy «Mýslıma» dámhanasy «QMDB Halal» standartyna tolyqtaı saı ekenin habarlaımyz.
