QURBAN-2020: 58 456 otbasyǵa qurbandyq eti taratyldy (FOTO)
Qasıetti Qurban aıttyń ekinshi kúninde de elimiz boıynsha qurban shalý rásimine qatysty uıymdastyrý-úılestirý jumystary joǵary deńgeıde ótti.
Úılestirý jumystaryna bekitilgen QMDB qyzmetkerleri kúsheıtilgen rejımde jumys istep, óz mindetterin tıisti deńgeıde oryndady. Jumys barysynda sanıtarlyq talaptardyń saqtalýy qatań qadaǵalandy.
Musylman qaýymynyń ulyq meıramynda qaıyrymdylyq sharasyn jandandyra túsý maqsatynda qurylǵan arnaıy jumys toby respýblıka boıynsha 58 456 muqtaj otbasyǵa qurbandyq etin jetkizdi.
Elimiz boıynsha www.qurban2020.kz saıtyna qashyqtan qurban shalýǵa tapsyrys bergen azamattardyń ýákildik qurbandyǵy tolyǵymen oryndaldy. Osy ýákildik qurbandyǵynyń esebin qajet etken jandarǵa atqarylǵan is-sharalardyń foto, vıdeo málimeti tolyq jiberildi. Ýákildik qurbandyqqa qatysty týyndaǵan suraqtar boıynsha azamattermen jeke jumys jasalyp, mamandarymyz tıisti jaýaptaryn berdi. Suraqtar tolyǵymen qanaǵattandyryldy.
Aıta ketsek, aıttyń birinshi kúni (31.07.2020) QMDB-nyń aımaqtaǵy ókildikteri kómekke zárý 30 715 otbasyǵa qurbandyq etin jetkizip, merekelik qýanyshqa bólegen bolatyn. Al aıttyń ekinshi kúninde (01.08.2020) 27 741 otbasyǵa et úlestirildi. Jalpy alǵanda, ıaǵnı, barlyq oblysty qamtyǵanda Qurban aıttyń eki kúninde 58 456 januıaǵa et jetkizildi.
Sonymen qatar, qurbandyq eti qarttar, jetimder, balalar úıleri men aýrýhanalarǵa tegin taratyldy. Merekelik qýanyshqa bólengen jandar alǵystaryn aıtyp, rızashylyq sezimderin bildirýde. Sondaı-aq, qashyqtan qurban shalýǵa tapsyrys bergen azamattar tarapynan da telefon, áleýmettik jeli, ýatsap arqyly jyly lebizder men ıgi tilekter kelip túsýde.
Osy rette Qazaqstan musylmandary dinı basqarmasynyń qaıyrymdylyq sharasyna belsendi túrde atsalysyp, muqtajdyń muńyn bólisip, saýapqa úles qosqan barsha azamattarǵa, sondaı-aq jekelegen kásiporyndar men uıymdardyń basshylaryna aıryqsha alǵys aıtamyz.
Alla Taǵala jasaǵan qaıyrymdylyqtyń qaıyryn ózderińizge eselep qaıtarsyn degen duǵa-tilektemiz.
