QURBAN-2020 qorytyndysy: QMDB 81 301 januıaǵa qurbandyq etin úlestirdi (FOTO)
Musylman merekesi qulshylyq pen qaıyrymdylyqtan bastalady. Ulyq meıram – Qurban aıtta jaǵdaıy bar adamǵa mindet bolǵan negizgi amal – qurban shalyp, ony muqtaj otbasyǵa taratý, osylaısha jabyrqaǵan jandardy merekelik qýanyshqa bóleý. Bul amal adam balasynyń qanaǵatshyldyq, jomarttyq, meıirbandyq, t.b. syndy adamdyq qasıetterin arttyrady.
Qazaqstan musylmandary dinı basqarmasy qoǵam aldyndaǵy qaıyrymdylyq qyzmetin jandandyra túsý maqsatynda jáne elimizdegi Epıdemıologııalyq jaǵdaı kezinde musylmandyq mindetti kedergisiz atqarýǵa ońtaıly usynys retinde www.qurban2020.kz jobasyn iske qosty.
Sanıtarlyq talaptardy saqtaı otyryp, osy jobany joǵary deńgeıde júzege asyrý úshin ár aımaqta jumys toby quryldy. QMDB ókildigi janynan qurylǵan jumys toby táýlik boıy qyzmet etti. Osy jobaǵa din qyzmetkerlerimen qosqanda 3 924 erikti, 872 kólik jumyldyryldy. Elimiz boıynsha aldyn ala belgilengen 35 statsıonarlyq qasaphanada 394 qasapshy jumys istedi. Al ár óńirdegi ortalyqtandyrylǵan jumys tobynda 447 adam qyzmet etti. Respýblıka boıynsha 25 sall-ortalyq qurban2020 jobasy boıynsha tıisti keńes pen aqparat berýmen aınalysty.
Elimiz boıynsha www.qurban2020.kz saıtyna qashyqtan qurban shalýǵa tapsyrys bergen azamattardyń ýákildik qurbandyǵy tolyǵymen oryndaldy.
Igi iske úles qosqan eriktiler men meshit jamaǵatynyń belsendi jumysynyń nátıjesinde 81 301 muqtaj otbasyǵa qurbandyq eti jetikizildi. Jer-jerdegi qarttar, jetimder, balalar úıleri men aýrýhanalarda da qaıyrymdylyq sharalary ótkizildi. Merekelik qýanyshqa bólengen jandar aıryqsha alǵystaryn aıtýda.
Aıta ketsek, QMDB-nyń aımaqtaǵy ókilderi aıttyń birinshi kúninde (31.07.2020) kómekke zárý 30 715 otbasyǵa qurbandyq etin úlestirdi. Al aıttyń ekinshi kúninde (01.08.2020) 27 741 januıa merekelik qýanyshqa bólendi. Qurban aıttyń úshinshi kúninde (02.08.2020) 22 845 otbasyǵa et taratyldy. Jalpy alǵanda, ıaǵnı barlyq oblysty qamtyǵanda Qurban aıttyń úsh kúninde 81 301 januıaǵa et jetkizildi.
Qazaqstan musylmandary dinı basqarmasy qaıyrymdylyq sharasyna belsendi atsalysqan azamattarǵa, jergilikti ákimdik ókilderine, sondaı-aq jekelegen kásiporyndar men uıymdardyń basshylaryna aıryqsha alǵys aıtady.
Alla Taǵala ıgi amaldyń saýabyn arttyryp, óz quzyretinde qabyldyqqa jazǵaı, jaqsylyǵyn jaýdyrǵaı. Kómek alǵan jandardyń rııasyz tilegi qabyl bolǵaı. Ámın!