Qurban aıt qarsańynda kishi Tóralqa májilisi ótti (FOTO)
Búgin elordada Bas múftı Naýryzbaı qajy Taǵanulynyń tóraǵalyǵymen Qurban aıt merekesi qarsańynda kishi Tóralqa májilisi ótti.
Jıynǵa Dinı basqarmanyń basshylyq quramy, bólim meńgerýshileri men mamandary, sondaı-aq oblystardyń bas ımamdary qatysty. QMDB Tóraǵasy din qyzmetkerlerin kele jatqan ulyq merekemen quttyqtap, kún tártibindegi birqatar máselege toqtaldy.
«Qurban aıt – kúlli musylman úmbetiniń ulyq meıramy bolǵandyqtan, bul kún din qyzmetkerleri úshin de óte mańyzdy ári jaýapty kezeń. Osy rette biz halqymyzǵa Qurban aıttyń máni men maǵynasyn jiti túsindirip, aıtta atqarylatyn dinı rásimderdiń durys oryndalýyna asa mán berýimiz qajet.
Árqaısymyz saýapty da jaýapty kezeńde ózimizge júktelgen mindetterdi rııasyz nıetpen joǵary deńgeıde uıymdastyrýymyz tıis», – dedi Naýryzbaı qajy Taǵanuly.
Bas múftı aıt kúnderi ótetin is-sharalardyń joǵary deńgeıde uıymdastyrylýyna, ásirese, meshitke kelgen jamaǵatqa yqylaspen qyzmet kórsetilip, halyqtyń qulshylyq jasaýyna, dinı aqparat alýyna, meshitterdegi dinı aqparat berý ortalyqtarynyń júıeli jumys isteýine basa nazar aýdardy. Odan bólek qurban shalý oryndarynda qasapshylardyń, et bólshekteýshi, et taratýshy mamandar men eriktilerdiń eńbek, tehnıka, órt qaýipsizdik erejelerin qatań saqtaýyn jáne qurbandyq shalý barysynda ysyrapshyldyqqa jol berilmeýin qadaǵalaýdy tapsyrdy.
Sondaı-aq májilis barysynda «Zeket jáne qaıyrymdylyq» qorynyń dırektory Qanat Qydyrmın qurban aıtqa daıyndyq jumystary jaıly málimdese, Ǵalamtor sektorynyń mamany qurban2022.kz saıtynyń jumys barysyn, búginge deıin kelip túsken tapsyrystar men ótinishter jóninde baıandady.
