Qyzdar arasynda Quran kárimdi jatqa oqýdan II Respýblıkalyq baıqaý bastaldy (FOTO)

Elordada Qazaqstan musylmandary dinı basqarmasynyń uıymdastyrýymen qyzdar arasynda Quran Kárimdi jatqa oqýdan II respýblıkalyq baıqaý bastaldy.

Dástúrge saı taǵylymy mol baıqaý qasıetti Quran aıattaryn oqýmen bastalsa, QMDB Tóraǵasy, Bas múftı Naýryzbaı qajy Taǵanuly qatysýshylarǵa sáttilik pen bereke tilep, el amandyǵy úshin duǵa jasady.

Qurannyń 5 para, 10 para, 20 jáne 30 parasyn jatqa oqý nomınatsııalary boıynsha ótetin baıqaý eki kúnge sozylady. Búgin baıqaý qatysýshylary 5, 10 jáne 20 parany jatqa oqýdan baq synasa, erteń Qurandy tolyq jattaǵan qarılar 30 parany jatqa oqýdan ózara myqtyny anyqtap, jarysty qorytyndylaıdy. Baıqaýdyń jalpy júlde qory – 6 500 000 teńge.  

Sondaı-aq baıqaýǵa «Qaýam Ad-dın Ál-Itqanı Ál-Farabı Át-Túrkistanı» respýblıkalyq qarılar daıyndaý ortalyǵynyń dırektory Sádýaqas qarı Oljabaı, Almaty Ortalyq meshitiniń naıb ımamy Serik qarı Ahmetov, Almaty qalasyndaǵy «Qaırat» meshitiniń ustazy Araılym Qýatova, Shymkenttegi «Yqylas» qarılar daıyndaý ortalyǵy qyzdar bóliminiń ustazy Zeınep Ábdirásil jáne qarı-ustaz Eńlik Qasymova qazylyq etýde.