«RAISA ANA» MEShITI QURBAN AIT MEREKESINDE BALALARǴA QÝANYSh SYILADY (FOTO)
Astana qalasyndaǵy «Rahymqyzy Raısa ana» meshitiniń bas ımamy Qalıjan Zańqoevtyń basshylyǵymen Qurban aıt merekesine oraı balalarǵa arnalǵan is-shara ótti.
Merekelik kóńil-kúı syılaý maqsatynda búldirshinderge táttiler salynǵan aıttyq qorapshalary taratyldy. Meshit bas ımamy búldirshinderge musylmannyń ulyq merekesi bolǵan Qurban aıttyń mańyzdylyǵyn túsindirip, óziniń aqyl-keńesi men nasıhatyn aıtty. Sondaı-aq, aq batasyn berip, elge paıdaly azamat, azamatsha bolýyn tilep duǵa jasady.
Qurban aıt – tek qurban shalýmen shektelmeıtin, adamdar arasyndaǵy meıirimdilik pen janashyrlyqty arttyratyn erekshe meıram. Bul kúnderi úlkenge qurmet, kishige izet kórsetý – ıslamnyń kórkem úlgisi sanalady. Ásirese, balalarǵa qýanysh syılaý, olardyń júregine jylýlyq uıalatý – Qurban aıttyń rýhanı mánin tereńdete túsedi. Osylar arqyly bala sanasyna ımandylyq, izgilik, qamqorlyq sekildi qasıetter sińiriledi.
