Ramazan aıyna arnalǵan medıa-jospar talqylandy (FOTO)
QMDB Tóraǵasynyń orynbasary, naıb múftı Ershat qajy Ońǵardyń jetekshiligimen Aqparat jáne qoǵammen baılanys bólimi qyzmetkerleriniń jınalysy ótti.
Jıynda Ershat Aǵybaıuly keshe ótken Tóralqa májilisindegi Bas múftı Naýryzbaı qajy Taǵanulynyń aqparat salasyna basymdyq berip otyrǵanyn tilge tıek etip, Ramazan aıyna arnalǵan medıa-jospardy talqylady.
«Sońǵy eki jylda álemdik pandemııaǵa baılanysty Ramazan aıyna arnalǵan baǵdarlamalar tek onlaın túrde uıymdastyryldy. Al bıyl, amandyq bolsa, dástúrli formatqa kóship, Ramazan aıynda halyqtyń rýhanı suranysyn óteý úshin tynbaı jumys isteýimiz kerek. Halyqqa jańa rýhanı jobalardy usynýymyz tıis. Áleýmettik jelilerde taratylatyn suraq-jaýap kartınkalarynan bastap, resmı saıtta jarııalanatyn oraza kestesi, sondaı-aq «Munara TV» arnasynan kórsetiletin baǵdarlamalardyń sapaly shyǵýy óte mańyzdy», – dep atap ótti naıb múftı.
