Ramazan qarsańynda Qazaqstanda tuńǵysh ret Quran kárim basylyp shyqty (FOTO)

Qasıetti Ramazan aıynyń qarsańynda elimizde alǵash ret Quran kitaby basylyp shyǵyp otyr. Bul Quran kárim Mádına basylymyna negizdele otyryp daıyndalǵan. Oqýǵa qolaıly bolýy úshin, ásirese, Quran oqýdy jańa bastaǵandarǵa jeńil bolýy úshin qarapaıym shrıft tańdalǵan.

Bul basylymnyń basty ereksheligi sol – aıattardyń arabsha mátini men qazaqsha aýdarmasyn tyńdaýǵa múmkindik beretin QR-kod qyzmeti qoldanylǵan. Naqtyraq aıtqanda, smartfonǵa nemese planshetke Play Market-ten nemese Apple Store-dan kez kelgen QR-kod reader programmasyn júktep alyp, ózińiz qalaǵan bettegi aıattyń arabsha-qazaqsha mátinin tyńdaýyńyzǵa bolady. Sol arqyly tilge qıyn soǵatyn tustarynyń qalaı durys oqylatynyn úırenip, tájýıdińizdi pysyqtap alasyz. Sondaı-aq, aıattardyń qazaqsha aýdarmasyn tyńdaý arqyly, Qurandy túsinip oqýǵa múmkindik tabasyz.

«Quran kárimnen bir árip oqyǵanǵa da saýap bar. Árbir saýap on ese bolyp jazylady» degen Paıǵambar (s.ǵ.s.) súıinshisin eskere otyryp, árdaıym Quranmen birge mol saýapqa kenelińiz. Qasıetti Ramazan aıyn qur jibermeńiz!