RESPÝBLIKALYQ DIN QYZMETKERLERI FORÝMYNYŃ ÚNDEÝI QABYLDANDY
Elordada «Islam jáne adal qoǵam» jyly aıasynda ótip jatqan «Adal qoǵam: bilim, rýhanı tárbıe jáne jaýapkershilik» atty din qyzmetkerlerine arnalǵan respýblıkalyq forýmynyń úndeýi qabyldandy.
Úndeý mátinimen kópshilikkke QMDB Strategııalyq taldaý jáne damý bóliminiń meńgerýshisi Smaıyl Seıtbekov oqyp berdi.
«Qoǵamnyń damýy men memlekettiń bolashaǵy eń aldymen adam boıyndaǵy adaldyqqa, bilimge, rýhanı tazalyqqa jáne azamattyq jaýapkershilikke baılanysty. Adal qoǵam qalyptastyrý árbir azamattyń júregindegi ımandylyqtan, sanasyndaǵy parasattylyqtan, is-áreketindegi ádildik pen jaýapkershilikten bastalady. Sondyqtan adal qoǵam qurý jolynda mynadaı baǵyttaǵy jumystarǵa basymdyq berilýi qajet dep sanaımyz:
Birinshi, bilim. Bilimdi urpaq eldiń erteńin qalyptastyrýǵa, ǵylym men tehnologııany damytýǵa, jahandyq básekege qabiletti memleket qurýǵa súbeli úles qosady. Óıtkeni bilim – qoǵam damýynyń basty negizi.
Ekinshi, rýhanı tárbıe. Adam boıyndaǵy ar-uıat, meıirim, sabyr, izet, qaıyrymdylyq, ádildik, úlkendi qurmetteý, kishige izet kórsetý, ata-anany syılaý, otbasylyq qundylyqtardy saqtaý syndy jaqsy qasıetter – adamgershilik pen qoǵamdyq turaqtylyqtyń negizgi kepili.
Úshinshi, jaýapkershilik. Árbir adam óz sózine, isine, otbasyna, kásibine jáne qoǵam aldyndaǵy mindetine jaýap bere bilýi kerek. Sybaılas jemqorlyqqa, alaıaqtyqqa, ótirikke, ádiletsizdikke, nemquraılylyqqa jáne qoǵamdyq múlikti búldirýge jol bermeý – adal qoǵamnyń basty talaby.
Biz qoǵamda adal eńbek etý mádenıetin qalyptastyrýdy árqashan dáripteýimiz qajet. Árbir azamat adal qyzmet etse, aıtalyq ustaz urpaqqa sapaly bilim berse, shákirt ádepti bolsa, ár adam zańdy qurmettese, qoǵamnyń irgesi berik bolary sózsiz. Sonymen qatar, jas urpaqty aqparattyq keńistiktegi jalǵan málimetterden, teris dinı ıdeologııalardan, radıkaldy kózqarastardan jáne adamgershilikke qaıshy áreketter men jat qylyqtardan saqtandyrý – barshamyzdyń ortaq mindetimiz», - delingen úndeýde.



