ShARAPATY MOL ShAǴBAN AIY
Naýryzbaı qajy TAǴANULY,
QMDB Tóraǵasy, Bas múftı
Qurmetti jamaǵat!
Barshańyzdy sharapaty mol Shaǵban aıynyń kelýimen shyn júrekten quttyqtaımyn!
Qasıetti Ramazan aıynyń kelgenin súıinshileıtin shaǵbanda ár shańyraqqa shattyq, baqyt pen bereke tileımin. Alla Taǵala osy aıda jasaıtyn duǵa-tilekterimizdi, qulshylyq pen izgi amaldarymyzdy qabyl etkeı!
Ardaqty Paıǵambarymyz (oǵan Allanyń salaýaty men sálemi bolsyn) óz úmbetin shaǵban aıy kirgende nıetti túzep, izgi amal jasaýǵa qulshyndyrǵan. Alla elshisiniń (oǵan Allanyń salaýaty men sálemi bolsyn) hadıs-sharıfinde aıtylǵandaı, shaǵban aıynda jasalǵan duǵa keri qaıtarylmaıdy. Endeshe, sharapaty mol shaǵban aıynda shynaıy nıetpen duǵa jasap, eki dúnıeniń baqytyn tileý lázim.
Izgi ǵulamalardyń biri: «Erejep – jelge, Shaǵban – bultqa, Ramazan jańbyrǵa uqsaıdy. Erejep aıynda dán egilmese, Shaǵbanda sýarylmasa, Ramazanda qandaı egin kútýge bolady», – degen. Osy aıda nıetimizdi túzep, nápil oraza ustap, múmkindiginshe izgi amal jasaýǵa tyrysaıyq. Quran oqyp, júregizdi nurǵa bóleıik. Óıtkeni, ardaqty Paıǵambarymyz (oǵan Allanyń salaýaty men sálemi bolsyn) «Quran oqý – kóńildiń shıpasy», – degen.
Alla Taǵala elimizge amandyq, jerimizge tynyshtyq, halqymyzǵa bereke násip etkeı. Jer betindegi barsha musylman úmbetine shaǵbannyń sharapatyna bólenýdi jazǵaı!
Haq Taǵala shaǵban aıyn berekeli etip, barshamyzdy aılardyń sultany, qasıetti Ramazanǵa aman-esen jetkizgeı! Áýmın!
