Shuǵyl: QMDB Halal bólimi habarlaıdy

Búgin, ıaǵnı 19 shilde kúni tutynýshylar tarapynan kelip túsken shaǵymǵa sáıkes «Ishtaev» JK shujyq tsehy óndirisi barysynda úlken tehnıkalyq qatelikter jibergeni anyqtaldy.

Atap aıtqanda, QMDB «HALAL» belgisi qoıylǵan qaptamasynda anyq túrde «shoshqa eti» dep jazylǵan. Oryn alǵan jaǵdaıǵa baılanysty bizdiń mamandar istiń mán-jaıyn anyqtaý maqsatynda Jambyl oblysy, Taraz qalasy, Mámbet batyr kóshesi 6-V meken-jaıy boıynsha ornalasqan shujyq tsehyna habarlasty.

Nátıjesinde atalmysh tseh QMDB «Halal» sertıfıkatyna ıe bolǵaly sharıǵatymyzda tıym salynǵan dońyz etin shujyq daıyndaý barysynda paıdalanbaıtyndyǵy anyqtaldy.

Óz kezeginde «Ishtaev» JK basshylyǵy eń aldymen tutynýshylardan keshirim suraı kele, shujyq qaptamasyn tapsyryspen jasaý barysynda jiberilgen kemshilik ekenin alǵa tartady.

Bul jaǵdaı shujyq qaptamasyn dızaındaý barysynda oryn alǵan. Tapsyrys barysynda logotıp qoıylyp, shujyq qaptamasynyń quramyndaǵy qospalar ózgerissiz qalyp qoıǵanyn aıtýda. 

Aıta ketetin jaıt, shujyq qaptamasynyń dızaınyn jasaıtyn mekemelerge túrli fırmalar tarapynan shujyqtyń ártúrine (halal, halal emes) usynystar kelip túsetinin eskerýdi suraımyz. 

«Ishtaev» JK basshylyǵy QMDB «Halal Damý» ujymynan jáne barsha tutynýshylardan oryn alǵan tehnıkalyq qatelikke baılanysty keshirim suraıtyndyǵyn jáne de aldaǵy ýaqytta mundaı óreskel qatelikter jibermeıtindigin málimdedi.