Sırııadan oralǵan qyz aqparattyq-túsindirý tobyna múshe boldy (FOTO)

«Jýsan» operatsııasymen Qazaqstanǵa oralǵan áıelderdiń biri Aınur Tergeýsizova Atyraý oblystyq din isteri basqarmasy janyndaǵy Aqparattyq-túsindirý tobyna (ATT) jumysqa alyndy dep habarlaıdy durbi.kz.

Aınur Tergeýsizova Sırııaǵa ketip qalǵan kúıeýiniń shaqyrtýymen Túrkııaǵa baryp, qaıtar bıletin kúıeýiniń talap etýimen keri tapsyrýǵa májbúr bolyp, Sırııa asyp ketken bolatyn. DAISh-tyń quramynda soǵysqa qatysyp ólgen kúıeýiniń súıegin de kórmegen Aınur soqyr senimmen adasyp Sırııaǵa ketken júzdegen qazaq áıelderi basynan keshken qıyndyqtardan ótip, «Jýsan» operatsııasynyń arqasynda týǵan jerge aman oraldy.

Atyraý jerine tabany tıgen sátten bastap, psıhologııalyq turǵyda qansha qıyn bolsa da halyqtyń aldyna shyǵyp, óziniń adasqanyn, sáláfılik aǵymnyń qate ekenin jáne onyń zalaly týraly óz basynan keshken ómirin mysal etip, jastarǵa túsindirip, halyqpen kezdesýden bas tartpaǵan Aınur, búgin, mine, ózine jan-jaqty kómektesken atyraýlyq din mamandarynyń qatarynda.