TÚRKISTANDA ISLAM INSTITÝTY AShYLADY

Túrkistan qalasynda ımamdardyń bilimin jetildirýge arnalǵan Islam ınstıtýty ashylady. QMDB Tóraǵasy, Bas múftı Naýryzbaı qajy Taǵanuly Túrkistan oblysynyń ákimi Darhan Satybaldymen bolǵan kezdesýde osyndaı kelisimge keldi.

2022 jyly Túrkistan qalasynda «Qylýet» rýhanı-mádenı ortalyǵynyń qurylysy bastalǵan edi. Bıyl paıdalanýǵa berý josparlanýda. Ortalyqta burynǵy tarıhı qalpyn saqtaǵan zamanaýı 500 adamǵa arnalǵan jerasty meshiti de bolady.

Dál osy ortalyqtyń janynan salynyp jatqan oqý ǵımaratynda ımamdardyń bilimin jetildirýge arnalǵan Islam ınstıtýty ashylady. Qazirgi tańda qajetti jaǵdaılar jasalýda. Oqý ǵımaraty 120 adamdyq jataqhana, 60 oryndyq kitaphana, 100 oryndyq dárishana jáne 60 oryndyq ashanamen qamtylady.

Aıta keteıik búginde Túrkistan oblysynda 800-ge jýyq meshitte 1100-den astam ımam qyzmet etýde. Degenmen ınstıtýt tek Túrkistan óńiriniń ımamdaryna ǵana emes, Jambyl, Qyzylorda oblysy men Shymkent qalasynyń din salasy qyzmetkerlerine dáris ótkizedi. Kýrs jylyna 4 ret uıymdastyrylsa, oqytý merzimi 2 aıǵa sozylady.

Túrkistan oblysyna jumys saparymen kelgen Qazaqstan musylmandary dinı basqarmasynyń tóraǵasy Naýryzbaı qajy Taǵanuly ortalyqtyń qurylys barysyn aralap, josparmen tanysqan bolatyn.

​ Derekkóz: QMDB Baspasóz qyzmeti