TÚRKITILDES MEMLEKETTERDIŃ MÚFTILER ALQASY: JUMYS JOSPARY TALQYLANDY
Qazaqstan musylmandary dinı basqarmasynyń uıymdastyrýymen Túrkitildes memleketterdiń Múftıler alqasy keńes hatshylyǵynyń jumys jospary talqylandy.
Jıynǵa QMDB Tóraǵasynyń orynbasarlary Ershat Aǵybaıuly men Sansyzbaı Qurbanuly, Apparat basshysy Ǵylymbek Jádigeruly men alqa keńesiniń hatshysy, Ýaǵyz-nasıhat bóliminiń meńgerýshisi Batyrjan Mansurov, Sharıǵat jáne pátýa bóliminiń mamandary Baýyrjan Ábdýáli men Medet Qurmashuly, sondaı-aq onlaın rejımde 5 memlekettiń jaýapty mamandary qatysty.
Alǵash bolyp sóz alǵan naıb múftı Ershat Aǵybaıuly jıynǵa onlaın qosylǵan baýyrlas memleketterdiń ókilderine QMDB Tóraǵasy Naýryzbaı qajy Taǵanulynyń sálemin jetkizip, basqosýǵa bereke tiledi. Budan keıin alqa keńesiniń hatshysy Batyrjan Berdenuly Túrkitildes memleketterdiń Múftıler alqasynyń jumys josparyn tanystyryp ótti. Erekshe atap ótetin bir jaıt, bıyl Almatyda Túrkitildes memleketterdiń dinı basqarma basshylarynyń tóraǵalyǵymen «Qoja Ahmet Iasaýı jáne sopylyq ilimi» halyqaralyq konferentsııasyn ótkizý josparlanyp otyr.
Aıta keteıik, 2024 jyly Qazaqstan musylmandary dinı basqarmasy ózi bastamashyl bolǵan Túrkitildes memleketterdiń múftıler alqasyna tóraǵalyq etedi. Bul jóninde jyl basyndaǵy Baǵdarlyq baıandamasynda Bas múftı Naýryzbaı qajy Taǵanuly: «Túrki memleketteri uıymyna qarasty baýyrlas elderdiń múftıler alqasyna tóraǵalyq etý mártebesiniń Qazaqstan musylmandary dinı basqarmasyna berilýi – siz ben bizge úlken jaýapkershilik júkteıdi» degen bolatyn.
