Túrli ult ókilderi «Berekeli Ramazan» dastarhanynda bas qosty (FOTO+VIDEO)

Keshe Nur-Sultan qalasyndaǵy túrli ult ókilderi respýblıkalyq «Áziret Sultan» meshitinde bas qosyp, «Berekeli Ramazan» dastarhanynan aýyz ashty. Qazaqstan halqy assambleıasynyń músheleri, osy kezge deıin «Áziret Sultan» meshitine kelip musylmandyq qabyldaǵan san túrli ult ókilderi bir úıdiń balasyndaı birlik tanytyp, baýyrmaldyqtyń ozyq úlgisin kórsetti.

QMDB tóraǵasynyń birinshi orynbasary, naıb múftı Naýryzbaı qajy Taǵanulynyń bastamasymen byltyrǵy jyldan beri meshittiń konferents zalynda arnaıy bólek uıymdastyrylyp kele jatqan «Berekeli Ramazan» dastarhany búgingi tańǵa deıin túrli top músheleri men san alýan qoǵamdyq uıym múshelerine jaıylyp keledi. Portal jańalyqtarynda buǵan deıin «Berekeli Ramazan» dastarhanynan kóp balaly analar, boksshylar, jedel járdem qyzmetkerleri dám tatqanyn jazǵan bolatynbyz.

Degenmen, keshegi aýyzashar dastarhanynyń mán-mańyzy aıryqsha bolǵandaı. Tili bólek, túri basqa bolǵanymen, Qazaqstan atty alyp shańyraq astynda tatý-tátti ǵumyr keship jatqan túrli ult ókilderiniń dostyǵy men baýyrmaldyǵy Bas meshittegi aýyzashar dastarhanynda burynǵysynan bekemdene túskendeı ańǵaryldy. Elimizdiń amandyǵyn, jerimizdiń tynyshtyǵyn tilegen qurmetti qonaqtardyń duǵa-batalary da birlikke úndep, baýyrmaldyqqa shaqyra túskendeı.

Sýretterdi «FOTOGALEREIa» aıdarynan kóre alasyzdar!