«ÝAQYP» qory múmkindigi shekteýli jandarǵa múgedekter arbasyn syılady
Astanada «DOS» Táýelsiz ómir» Ortalyǵy LDS Charities halyqaralyq qaıyrymdylyq uıymymen birlesip, «WAQYP» korporatıvtik qaıyrymdylyq qorynyń qoldaýymen 16-18 qazan aralyǵynda «Múgedektigi bar azamattardyń ómir saltyn jaqsartý jáne múgedekter arbasyn jınaý» trenıng ótkizdi. Rýhanı kelisim kúnine oraı «Barys-Arena» sport kesheninde uıymdastyrylǵan is-sharaǵa QR Densaýlyq saqtaý mınıstrligi, Eńbek jáne áleýmettik qorǵaý, sondaı-aq, Qoǵamdyq damý mınıstrliginiń ókilderi men buqaralyq aqparat quraldary qatysty.
Oqý kýrsy tolyq aıaqtalǵannan keıin «WAQYP» korporatıvtik qaıyrymdylyq qory arbalardy Múgedekter qoǵamdyq birlestigi «DOS» Táýelsiz ómir» Ortalyǵy usynǵan tizim boıynsha Qazaqstannyń barlyq oblystaryna jetkizip beredi.
Aıta ketetini, túrli áleýmettik jobalardy qoldaýmen aınalysatyn «WAQYP» korporatıvtik qaıyrymdylyq qory 2017 jyldyń shilde aıynda Memleket basshysy N.Nazarbaevtyń tapsyrmasymen qurylǵan. Elbasynyń 2017 jylǵy 20-maýsymdaǵy Jarlyǵyna sáıkes, atalmysh qor jeke jáne zańdy tulǵalardyń erkin túrde bólgen qarjylaryn biriktirip, qaıyrymdylyq jasap, áleýmettik jobalardy júzege asyrýǵa joldaýdy, dástúrli rýhanı jáne dinı qundylyqtardy damytý, beıbitshilikti nyǵaıtý, qoǵamda dostyq pen kelisimdi saqtaý, rýhanı bilim berý uıymynyń, dinı, tarıhı, mádenı mańyzy bar ǵımarattar men nysandardyń qyzmetin qamtamasyz etý jáne dinı mekeme qyzmetkerlerin jáne rýhanı uıymdardyń qyzmetkerlerin qoldaýdy kózdeıdi. Sonymen qatar, halyqtyń dinı saýatyn arttyrý, dinı radıkalızm men Ekstremızmniń aldyn alý, psıhologııalyq jáne quqyqtyq kómek kórsetý jáne teris pıǵyldy aǵymdardan zardap shekken azamattardy áleýmettik turǵyda beıimdeýdi maqsat tutady. Munyń barshasy 2017-2020 jyldarǵa arnalǵan memleket saıasatynyń din salasyndaǵy mańyzdy bóligi sanalady.
16-18 qazan kúnderi ótken trenıng barysynda «ÝAQYP» qaıyrymdylyq qory 30 birdeı múmkindigi shekteýli janǵa múgedekter arbasyn tegin tabystasa, qalǵany respýblıkanyń barlyq óńirindegi muqtaj jandarǵa ótinim men kestege sáıkes taratylmaq. Arbalardy ádil túrde bólý qatań baqylaýda bolady jáne jobanyń ashyqtyǵyn tolyqtaı qamtamasyz etemiz deıdi qor qyzmetkerleri.
