Ulystyń uly kúnine oraı Bas meshitte merekelik shara ótti (FOTO)

Ulystyń uly kúni – Áz Naýryz meıramyna oraı Nur-Sultan qalasyndaǵy respýblıkalyq «Áziret Sultan» meshitinde merekelik shara uıymdastyryldy. Ulttyq merekege oraı meshit aýlasyna kazaq úıler tigilip, jamaǵat arasynda ulttyq sport túrlerinen saıys ótkizildi.

Besin namazynan soń meshit aýlasynda bas qosqan jamaǵat arasynda láńgi tebý, buqa tartys, gir kóterý jáne qol kúrestirý oıyndary oınatylyp, jeńimpazdarǵa estelik syılyqtar berildi.

Meshit aýlasyndaǵy merekelik sharaǵa QMDB tóraǵasy, Bas múftı Naýryzbaı qajy Taǵanuly jáne Nur-Sultan qalasy ákiminiń orynbasary Berik Jákenov syndy qurmetti qonaqtar qatysyp, jamaǵatty Naýryz merekesimen quttyqtady. Nur-Sultan ókildigi Áıel-qyzdar sektorynyń uıytqy bolýymen boı kótergen qazaq úıge bas suǵyp, ulttyq taǵamdarymyzǵa tunyp turǵan merekelik dastarhannan dám tatty. Ulystyń uly kúnine oraılastyrylǵan tusaýkeser rásimine qatysyp, sábıdiń qulaǵyna azan shaqyryp, esimin qoıdy. Bas múftı Naýryzbaı qajy Taǵanuly sábıge aq batasyn berip, Ulystyń uly kúninde salt-dástúrimiz ulyqtaldy. Dastarhan basynda qazaqy qara dombyra kúmbirlep, án men jyrdan shashý shashyldy.

Sýretterdi «FOTOGALEREIa» aıdarynan kóre alasyzdar!