USTAZDYQ ETÝ – ULY IS

Qurmetti ustazdar!

Barshańyzdy ustazdar kúnimen shyn júrekten quttyqtaımyn. Alla Taǵala saýapty isterińizdiń jemisin kórýdi násip etkeı. Denińizge saýlyq, otbasyńyzǵa amandyq, urpaq tárbıesindegi ulaǵatty isterińizge bereke tileımin!

«Adamnyń adamshylyǵy ustazdan» dep Hákim Abaı aıtqandaı, boıyna parasattylyq pen baısaldylyq, danalyq pen kórkem minez qalyptastyra bilgen nemese óz salasynda belgili bir jetistikke jetken kez kelgen tulǵa ustaz tárbıesin alyp, tájirıbe jınaıdy.

Ómirdiń osy bir ǵıbratty sátteri árkez jalǵasa bermek. Óıtkeni, ustazdyq etý – óz ýaqytyńdy aıamaý degen sóz. Allaǵa unamdy isterdiń barlyǵyna mol saýap jazylady. Solardyń ishinde adam tárbıeleýdiń mańyzy úlken. Tárbıe isi – abyroıly jumys.

Bir hadıste: «Adam qaıtys bolǵanda amal dápteri jabylady. Myna úsh kisiniń ǵana saýaby jalǵasa beredi: artynan duǵa joldaıtyn ıgi urpaq qaldyrǵan, el ıgiligine jaraıtyn dúnıe saldyrǵan, artyna ilim qaldyrǵan adam» delingen. Artyna ilim qaldyrǵan ustazǵa shákirti árdaıym duǵa jasap, jaqsylyq tilep júredi. Sondaı azamattardyń qatary kóbeısin dep tileımiz.

Alla Taǵala barsha ustazdarǵa jar bolyp, izgi amaldarynyń saýabyn eselep jazǵaı. Áýmın!

​